Ահաբեկչության դեմ պայքարում Ադրբեջանը համարվում է ԱՄՆ-ի ակտիվ դաշնակիցը

Ադրբեջանը հանդիսանում է հակաահաբեկչական կոալիցիայում ԱՄՆ-ի ակտիվ դաշնակից. հայտարարել է Ադրբեջանի նախագահին առընթեր Ռազմավարական հետազոտության կենտրոնի (ՌՀԿ) տնօրեն Ֆարհադ Մամեդովը։ CNN լրատվական գործակալության հաղորդմամբ՝ վերջինս, հանդես գալով «Տարածաշրջանային անվտանգության երկընտրանք. սպառնալիքներ և հեռանկարներ» զեկույցով «Ադրբեջանա-ամերիկյան համագործակցության դերը տարածաշրջանային խաղաղության ու անվտանգության հաստատման մեջ» թեմայով խորհրդաժողովում, հայտարարել է, որ «Ադրբեջանն ապահովում է ԱՄՆ-ի մերձակա դաշնակիցների՝ Իսրայել, Վրաստան, Թուրքիա, Իտալիա և այլն, էներգետիկ անվտանգությունը»։ Անդրադառնալով ԼՂ հիմնահարցին՝ Մամեդովն ընդգծել է, որ Ադրբեջանը մինչև հիմա հույս է տածում, որ համանախագահ երկրները կհարգեն ՄԱԿ-ի ԱԽ-ի 4 բանաձևերի վերաբերյալ սեփական որոշումները։

«Երբեմն տպավորություն է ստեղծվում, որ Հայաստանի ծայրահեղական դիրքորոշումը ոչ մի դատապարտության չի հանդիպում։ Այն ժամանակ, երբ Ադրբեջանի դիրքորոշումը մատուցվում է որպես մաքսիմալիզմի որակում, և պահանջում են լրացուցիչ զիջումներ»,- հայտարարել է ՌՀԿ-ի ղեկավարը, նշելով, որ հավասարակշռությունը ոչ միշտ է համահավասար օբյեկտիվությանը։ Նրա խոսքով՝ մտահոգություն է առաջացնում նաև այն փաստը, որ տարածաշրջանային անվտանգությունը և ԱՄՆ-ի քաղաքականությունը կախված է Միացյալ Նահանգներում փոքր խմբերի ազդեցությունից. «Այդ խմբերը իրական սպառնալիք են ստեղծում տարածաշրջանում ԱՄՆ-ի լիարժեք ու արդյունավետ արտաքին քաղաքականության իրագործման համար»,-նշել է Մամեդովը։

Վերջինիս խոսքերով՝ ընթացիկ քսան տարվա ընթացքում ունենալով նման բարդ հակամարտություն՝ Ադրբեջանը կարողացել է իրագործել բոլոր տարածաշրջանային նախագծերը և շարունակում է ձևավորել ողջ տարածաշրջանի տնտեսական զարգացման նոր ճարտարապետությունը։ Սակայն ԱՄՆ-ը, ըստ ՌՀԿ ղեկավարի գնահատման, ակտիվ չէ ապագայի անվտանգության կազմավորման մեջ. «Հայտարարությունը այն մասին, որ հակամարտության կարգավորումը կախված է կողմերի կամքից՝ դա առնվազն անպատասխանատու կոչ է։ Մամեդովի խոսքերով՝ 20 տարիների ընթացքում տարածաշրջանում ԱՄՆ-ի քաղաքականությունը կառուցողական դեր է խաղացել Ադրբեջանի և Վրաստանի անկախության ամրապնդման հարցում և տարածաշրջանային անվտանգության ապահովման գործընթացում։

«Սակայն հայկական սփյուռքի ազդեցության պատճառով ԱՄՆ-ն ի վիճակի չէ ակտիվ մասնակցություն գործել Հարավային Կովկասում անվտանգության գլխավոր սպառնալիքի՝ հայ-ադրբեջանական, ղարաբաղյան հակամարտության օբյեկտիվ կարգավորման մեջ»,-մատնանշել է նա։ «Հանգամանքների ցանկացած զուգադիպման դեպքում հակամարտության կարգավորումը չի սպառնում տարածաշրջանում ԱՄՆ-ի շահերին, այլ ընդհակառակը՝ այն անվտանգ ու հաջող զարգացող ձևավորման պայմաններ կստեղծի տարածաշրջանում, որտեղ բոլոր երկրները կունենան գործընկերային հարաբերություններ Միացյալ Նահանգների հետ»,-հավելել է Ադրբեջանի ՌՀԿ-ի տնօրենը։