ԵԱՀԿ նախագահը զրույցներ է ունեցել Միրզոյանի և Բայրամովի հետ

ԵԱՀԿ գործող նախագահ, Հյուսիսային Մակեդոնիայի Հանրապետության արտաքին գործերի նախարար Բուջար Օսմանին  հեռախոսազրույցներ է ունեցել Հայաստանի արտգործնախարար Արարատ Միրզոյանի և Ադրբեջանի արտգործնախարար Ջեյհուն Բայրամովի հետ։

 Օսմանին մտահոգություն է հայտնել Լաչինի միջանցքի շուրջ ստեղծված իրավիճակի և խաղաղ բնակչության, մասնավորապես խոցելի խմբերի, այդ թվում՝ կանանց և երեխաների վրա դրա ազդեցության վերաբերյալ: Ընդգծելով, որ ուշադիր հետևում է իրավիճակին, նա կրկնել է կառուցողական և արդյունավետ երկխոսության իր կոչը՝ որպես կայուն լուծումների ճանապարհ՝ ի շահ հակամարտությունից տուժած բնակչության:

Բուջար Օսմանին ընդգծել է, որ մարդասիրական նկատառումները և ժողովրդի հրատապ կարիքները պետք է գերակայեն։ Նա առաջարկել է իր բարի ծառայությունները, ինչպես նաև ԵԱՀԿ-ի վստահության ամրապնդման գործիքներն ու միջոցները Հայաստանի և Ադրբեջանի միջև հարաբերությունների կարգավորման և վստահության ձևավորման որոշումների շրջանակներում։

Հիշելով երկու նախարարների հետ իր նախորդ հանդիպումները և երկու մայրաքաղաքներ կատարած այցերը՝ ԵԱՀԿ գործող նախագահ Օսմանին պատրաստակամություն է հայտնել շարունակել իր անձնական և ակտիվ ներգրավվածությունը կողմերի հետ։ Այս առումով նա կրկնել է, որ ԵԱՀԿ նախագահությունը պատրաստ է դյուրացնել երկխոսությունը՝ կայուն և խաղաղ կարգավորման հասնելու համար։