Տեխասում կնոջ վրա միաժամանակ հարձակվել են բազեն և օձը

Տեխասում բնակվող կինը ծանր վնասվածքներ է ստացել այն բանից հետո, երբ նրա վրա միաժամանակ հարձակվել են բազեն և օձը, գրում է BBC-ն։

Օձը երկնքից ընկել է 64-ամյա Փեգի Ջոնսի վրա, երբ նա հնձում էր իր այգու սիզամարգը։ Միջադեպը տեղի է ունեցել հուլիսի 25-ին Սիլսբի քաղաքում, որը գտնվում է Լուիզիանայի հետ Տեխասի սահմանի մոտ։

Սողունին գցել է նրա տան վրայով թռչող բազեն, որն անմիջապես փորձել է հետ վերցնել իր զոհին։

Արդյունքում օձը կախվել է Տեխասի բնակչուհու ձեռքից ու սկսել հարձակվել նրա դեմքի վրա, իսկ բազեն ճանկերը խրել է նրա մեջ։

«Ես փորձեցի ցած նետել օձին, բայց նա փաթաթվել էր ձեռքիս շուրջը», - ասել է Ջոնսը CBS News-ին: «Օձը հարվածում էր դեմքիս, մի ​​քանի անգամ խփեց ակնոցներիս... Ես անընդհատ փորձում էի նրան ցած նետել, բայց այն համառորեն կպել էր»:

Ջոնսը անմիջապես հասկացավ, որ օձին, ամենայն հավանականությամբ, «կորցրել է» գիշատիչ թռչունը, քանի որ հարձակման պահին կինը բաց տարածության մեջ է եղել, ուստի սողունը չէր կարող ծառից ընկնել։

Քանի որ գիշատիչ թռչունն անմիջապես չի կարողացել օձին պոկել Փեգի Ջոնսից, նա մի քանի անգամ խրել է իր ճանկերը նրա ձեռքերի մեջ։

Մենամարտն ավարտվել է բազեի հաղթանակով, որը տարել է իր զոհին, որից հետո Փեգի Ջոնսի ցնցված ամուսինը կնոջը տեղափոխել է հիվանդանոց։

«Ես ունեի մաշկի վրա կտրվածքներ, քերծվածքներ և ուժեղ կապտուկներ», - ասել է Ջոնսը: Նա հավելել է, որ հարձակման ժամանակ օձը կոտրել է իր ակնոցները։