ՀԱԿ ակտիվիստի դատական գործում քաղաքական մոտիվացիան ակնհայտ է. Նաիրա Զոհրաբյան

ԱԺ ԲՀԿ խմբակցության քարտուղար Նաիրա Զոհրաբյանը, գնահատելով Վերաքննիչ դատարանի որոշումը, ասաց, որ Տիգրան Առաքելյանի փաստաբանի միջնորդությունը պետք է բավարարվեր։

«Միանշանակ միջնորդությունը պետք է բավարարվեր։ Կարծում եմ նաև, որ Վերաքննիչ դատարանը պիտի լրջագույնս ուսումնասիրեր այն բազան, որի հիման վրա Առաջին ատյանի դատարանը նման որոշում էր կայացրել»,-ասաց Զոհրաբյանը։

Զոհրաբյանի կարծիքով՝ սթափ տրամաբանությունը պետք է հաղթի և մինչև դատավճռի վերանայումը գոնե խափանման միջոցը պետք է փոխվեր։

«Հերթական անգամ, ինչպես շատ հաճախ է լինում մեզանում, հաղթեց ոչ թե սթափ տրամաբանությունը, այլ` ինչ-ինչ հաշվարկներ։ Այն, որ քաղաքական մոտիվացիա այստեղ կա, դա ակնհայտ է։ Ինձ համար բացարձակապես հասկանալի չէ, թե նման ապացուցողական թույլ բազայով ինչպես կարելի է նման վճիռ կայացնել։ Սա է խնդիրը, և մենք` «Բարգավաճ Հայաստան» կուսակցությունը, ԲՀԿ պատգամավորները, ամենայն ուշադրությամբ հետևելու ենք այս դատավարությանը, և կրկնում եմ`քանի դեռ ուշ չէ, այս ատյանի դատարանը ուղղակիորեն պիտի բեկանի այս դատավճիռը։ Այլապես Առաքելյանի փաստաբանները, ակնհայտ է, որ շարունակելու են դիմել այլ ատյաններ։ Ես չեմ ցանկանա, որ հերթական անգամ Եվրոպական դատարանը ստիպված լինի ընդդեմ Հայաստանի Հանրապետության որոշում կայացնել»։

Հիշեցնենք, որ երեկ Վերաքննիչ դատարանում դատավորը մերժեց ՀԱԿ ակտիվիստ Տիգրան Առաքելյանի փաստաբան Վահե Գրիգորյանի միջնորդությունը Տիգրան Առաքելյանի խափանման միջոցը փոխելու և վերջինիս ազատ արձակելու մասին։

Նշենք նաև, որ ՀԱԿ ակտիվիստների դատավարությանը ներկա էին ԲՀԿ պատգամավորներ Էլինար Վարդանյանն ու Նաիրա Զոհրաբյանը։

Գայանե Համբարձումյան