Մեզ իրական հնարավորություն չի տրվել․ երեք օր է՝ պատերազմների մեջ ենք. Արմեն Աշոտյանի փաստաբան

ՀՀԿ փոխնախագահ Արմեն Աշոտյանի կալանավորման ժամկետը ևս երկու ամսով երկարացնելու միջնորդության քննությունը կրկին հետաձգվեց։ Խնդիրն այն է, որ միջնորդությանը քննիչի կողմից կցված տեսագրությունների 9 սկավառակներից Արմեն Աշոտյանը ՔԿՀ-ում կարողացել է ծանոթանալ միայն մի մասին։ 

ԼՈՒՐԵՐ.com-ի հետ զրույցում փաստաբան Բենիկ Գալստյանը նշեց, որ նյութերին ծանոթանալու խնդիր կար․ 

«Ծանոթացման բավարար միջոցները` տեխնիկան և ժամանակ մեզ չէր տրամադրվել, այդ իսկ պատճառով ժամկետ տրամադրեց դատարանը, ճիշտ է մեր ցանկացած չափը չտրամադրեց մեզ համար անհասկանալի  տրամաբանության մեջ, բայց, ինչևէ,  տրամադրեց»,- ասաց Գալստյանը: 

Փաստաբանի խոսքով` օրենքը պահանջում է, որ ինչ նյութ տրամադրվել է դատարանին, այդ նյութերը տրամադրվեն նաև պաշտպանության կողմին և պետք է իրական հնարավորություն լինի, որպեսզի մարդը ծանոթանա դրան ամբողջությամբ. 

«Այս պայմաններում մեզ իրական հնարավորություն չի տրվել։ Արմեն Աշոտյանին տվել են 19 հատ սկավառակ ոնց է ծանոթանալու կարճ ժամանակահատվածում։ Այս երեք օրը այդ պատերազմների մեջ ենք` դիսկը չէր բացում, տարան ինչ-որ սենյակ համակարգիչ տվեցին նորից չէր բացում և այսպես մի կերպ կիրակի օրը հազիվ կարողացան մի բան տրամադրել և զուգընթաց ես էլ էի մտնում Աշոտյանի մոտ, իրար հետ էինք ծանոթանում և այլն։ Եթե մարդուն փակում են` պետք է ասեն ինչի համար են փակում, ապացույց պետք է լինի, ապացույցին հասանելիություն չեն տալիս»,- ասաց Բենիկ Գալստյանը։ 

Հիշեցնենք, որ Արմեն Աշոտյանի նկատմամբ հնարավոր հետապնդում հարուցելու հարցը լայն տարածում ստացավ հատկապես նախորդ տարվա վերջերին, երբ ԵՊԲՀ նախկին ռեկտոր Միքայել Նարիմանյանի նկատմամբ քրեական հետապնդում հարուցվեց՝ դեռեւս 2015 թ. համալսարանից խոշոր չափերի ենթադրյալ հափշտակության առթիվ հարուցված քրեական գործի շրջանակներում։ Դեռևս այդ ժամանակ մամուլը գրել էր, որ Նարիմանյանին ձերբակալելու հիմնական նպատակն Արմեն Աշոտյանի դեմ ցուցմունք կորզելն էր։ 2022թ. նոյեմբերի 16-ի կեսգիշերին Արմեն Աշոտյանին «Զվարթնոց» օդանավակայանում թույլ չեն տվել մեկնել ՀՀ-ից՝ պատճառաբանելով, թե նա մեղադրյալ է։ Նույն օրը երեկոյան Արմեն Աշոտյանը հրավիրվել է ՀՀ ՔԿ, որտեղ նրան մեղադրանք է առաջադրվել պաշտոնեական լիազորությունները չարաշահելու և փողերի լվացման հատկանիշներով։ Նրա նկատմամբ որպես խափանման միջոց է կիրառվել բացակայելու արգելքը։ 

Նշենք, որ Արմեն Աշոտյանի կալանավորման ժամկետը երկարացնելու միջնորդության քննությունն, ըստ էության, դեռևս չի իրականացվել։ Միջնորդության քննությունը նախատեսված էր օգոստոսի 12-ին, սակայն դատական նիստը հետաձգվել էր՝ պայմանավորված քննիչի կողմից ներկայացված 9 ձայնասկավառակով, որոնց ընդհանուր տևողությունը 23 ժամ է։ Նշված տեսագրություններին Արմեն Աշոտյանը, ինչպես պարզվեց, ՔԿՀ-ում ամբողջությամբ ծանոթանալու հնարավորություն չի ունեցել և այդ հանգամանքով պայմանավորված՝ այսօր ևս միջնորդության քննությունն ընդմիջվեց՝ մինչև ժամը 18.30-ը։ 

Լիլիթ Զալիբեկյան