Գայանե Ասլամազյան. Երկու բնակարաններս էլ նույն ճակատագրին են արժանացել

Ըստ արդեն տարածված տեղեկությունների՝ մի շարք մարդիկ բնակարաններ են գնել տարբեր նորակառույց շենքերում, սակայն ամիսներ անց բացահայտվել է, որ նույն բնակարանը վաճառված է ևս մի քանի հոգու։ Աջափնյակ վարչական շրջանում մի բնակարան էլ գնել էր հաղորդավարուհի Գայանե Ասլամազյանը և հետագայում իմացել, որ այն այլ սեփականատերեր էլ ունի: Այժմ հարուցված քրեական գործին զուգահեռ Գայանեն քաղհայցով դիմել է Աջափնյակ և Դավիթաշեն վարչական շրջանների ընդհանուր իրավասության դատարան անշարժ գույքի սեփականության իրավունքի նախնական պայմանագիրը վավեր ճանաչելու պահանջով: Այս մասին գրել էր «Ժողովուրդ»-ը: Lurer.com-ը զրուցեց հաղորդավարուհու հետ, ով նշեց, որ դեպքը տեղի է ունեցել մոտ երկու տարի առաջ։

«Անկեղծ ասած, զարմացա, որ նոր են տարածվում այս մասին լուրերը, քանի որ բնակարանը գնել եմ երկու տարի առաջ և արդեն մեկ տարի է, ինչ դատական գործ է ընթանում:

Պետությունը տեղյակ է. քրեական գործ է հարուցվել, որն ընթացքի մեջ է և արդեն մոտենում է ավարտին: Հնարավոր է, որ մինչ այս տարվա վերջ լուծում ստանա, սակայն դեռ կոնկրետ ժամկետ չկա դրա ավարտի մասին: Եվ մինչև քրեական դատը չլինի, քաղաքացիականը վերջնական որոշում չի կարող կայացնել:

Ինչպես պարզվեց, հաղորդավարուհին առաջին անգամ չէ նման խարդախության «զոհը» դառնում: Մինչև Աջափնյակ վարչական շրջանում բնակարան գնելը, նա ավելի վաղ բնակարան է գնել Կենտրոն համայնքում, որը ևս արժանացել է երկրորդ բնակարանի ճակատագրին:
«Իհարկե, փոքր-ինչ տարբեր են հանգամանքները: Եթե առաջին բնակարանի դեպքում երկու սեփականատեր կար, ապա այս մեկի հետ մի փոքր այլ են խնդիրները, որոնք, հուսամ, մինչև տարեվերջ կլուծվեն»:

Ի դեպ, Գայանե Ասլամազյանը խոստովանեց, որ խարդախության մասին իմացել է լրատվամիջոցներից, երբ արդեն մեծ աղմուկ է բարձրացած եղել այդ բացահայտման շուրջ։ «Այնքան զբաղված եմ եղել, որ նույնիսկ չեմ էլ իմացել, որ խարդախության զոհ եմ դարձել: Երևի վերջիններից մեկն եմ եղել, ով իմացել է այդ մասին»,-ասաց նա։