Արցախը պետք է լինի բանակցային կողմ, այլապես ցանկացած բանակցություն անիմաստ է. Քաղաքագետ

Քաղաքագետ Հրանտ Միլիք-Շահնազարյանի կարծիքով՝ արտգործնախարարների փարիզյան հանդիպման գլխավոր ձեռքբերումը կողմերի պատրաստակամությունն է շարունակելու աշխատանքները ԵԱՀԿ ՄԽ համանախագահների հետ: Քաղաքագետն առանձնացնում է հանդիպմանը նախորդող երեք կարևոր գործոն՝ առաջինը՝ Սերժ Սարգսյանի հայտարարությունն Ադրբեջանի կողմից Ռամիլ Սաֆարովին ներում շնորհելուց հետո, երկրորդը՝ Ավստրալիայի նահանգներից մեկի կողմից ԼՂՀ ճանաչումն է, երրորդը՝ Ադրբեջանի կողմից Հարավային Սուդանի անկախության ճանաչումը: «Այս գործոնները պետք է դառնան մի նոր ելակետ ԼՂ հիմնախնդրի կարգավորման գործընթացում»: Այս մասին լրագրողների հետ հանդիպմանն ասաց քաղաքագետ Հրանտ Մելիք-Շահնազարյանը:

Թե ինչպիսի առաջարկներ կանեն ԵԱՀԿ ՄԽ-ի համանախագահները տարածաշրջան կատարած այցի ընթացքում, Հրանտ Միլիք-Շահնազարյանը դժվարանում է ենթադրել, բայց կարծում է, որ ԵԱՀԿ ՄԽ-ն փորձում է պահպանել կայուն իրավիճակ: Չնայած Ադրբեջանը ցանկանում է Թուրքիային ներգրավել որպես միջնորդ, սակայն Ադրբեջանն ու Թուրքիան շահագրգռված չեն պատերազմի վերսկսման հարցում:

«Ստատուս քվոյի փոփոխության փորձով Ադրբեջանը ճանապարհ է բացում տարածաշրջանում Թուրքիայի ակտիվության համար»,- կարծում է վերջինս, հավելելով, որ արտգործնախարարների հանդիպման գլխավոր թեման, անկասկած, պետք է լիներ Ռամիլ Սաֆարովի հարցը:

«Արցախի ճանաչման հարցը պետք է տեղավորել աշխարհում տեղի ունեցող կարևոր քաղաքական գործընթացներում, այդ ժամանակ Հայաստանը կկարողանա ճանաչել ԼՂ անկախությունը և կկարողանա Արցախը միավորել Հայաստանին»,-ասում է քաղաքագետը և նկատում, որ Արցախը պետք է լինի բանակցային կողմ, այլապես ցանկացած բանակցություն անիմաստ է: