Թրամփը պետք է կամավոր ներկայանա քրեակատարողական հիմնարկ՝ պաշտոնական ձերբակալման համար

ԱՄՆ նախկին նախագահ Դոնալդ Թրամփը և Ջորջիա նահանգում ընտրություններին միջամտելու գործով մյուս մեղադրյալները մինչև օգոստոսի 25-ը կամովին պետք է ներկայանան Ֆուլթոն շրջանի բանտ, որտեղ նրանց պաշտոնապես կձերբակալեն։ Այս մասին հայտնում է CNN-ը՝ շրջանի շերիֆի գրասենյակին հղումով։

Ինչպես հայտնի է դարձել, բոլոր 19 ամբաստանյալները կտեղափոխվեն շրջանային բանտ, որտեղ կանցնեն պաշտոնական ձերբակալման ընթացակարգ։ Բանտում նրանց կխուզարկեն, կնկարեն ու մատնահետքեր կվերցնեն։

Հեռուստաալիքը նշում է, որ կողմերը սովորաբար նախապես պայմանավորվում են մեղադրյալներին իշխանություններին կամավոր հանձնվելուց հետո ազատ արձակելու պայմանների շուրջ։

Ավելի վաղ Ֆուլթոնի շրջանի դատախազ Ֆանի Ուիլիսը հայտարարել էր, որ ԱՄՆ նախկին նախագահ Դոնալդ Թրամփը պետք է դատարան ներկայանա օգոստոսի 25-ից ոչ ուշ։ Նա նշել է, որ Ջորջիայի մեծ ատենակալների դատարանը մեղադրյալներին ձերբակալելու օրդեր է տվել: Նա նաև մտադիր է խնդրել, որ վեց ամսվա ընթացքում սկսվի Թրամփի և նրա հետ կապված անձանց հետաքննությունը 2020 թվականի ընտրություններին ենթադրյալ միջամտության գործով։