Ինչու են «ապամոնտաժման շոուները» շրջանցում ՔՊ-ական ավագանու անդամների բիզնեսները

Վերջին շրջանում բավական հաճախ է խոսվում ապօրինի շինարարության դեմ պայքարն ակտիվացնելու անհրաժեշտության մասին: Միևնույն ժամանակ, քչերը գիտեն, որ այդպիսի շինարարության հանդեպ Նոր Հայաստանում մեծ սեր ունեն ոչ միայն շարքային քաղաքացիները, այլ նաև իշխանական ավագանու անդամները, որոնց ապօրինությունները, սակայն, պատկան մարմինները նույն ջանասիրությամբ չեն վերհանում և չեն կասեցնում:

 Վերջերս մամուլը գրել էր, որ Գյումրիի Լևոն Մադոյան և Տիգրան Մեծ փողոցների խաչմերուկում գտնվող մայթի վրա Գյումրիի ավագանու ՔՊ-ական անդամներից մեկը՝  Երվանդ Խանամիրյանն իրականացնում է շինարարական աշխատանքներ՝ չունենալով համապատասխան շին.թույլտվություն: Մինչ Գյումրիի քաղաքապետարանից հայտնում էին, որ քանդման աշխատանքներ են իրականացվում, լրագրողների տեսախցիկը ֆիքսել էր, որ ապօրինի կառույցի շինաշխատանքները ողջ թափով շարունակվում են:

Երևանում բնակվող Դավթյանների ընտանիքը վերջերս ահազանգել էր, որ Դիլիջանի ՔՊ-ական ավագանու անդամ Նարեկ Հարությունյանը նոր շինարարություն է կատարում իրենց տարածքի վրա: Քաղաքացիները շեշտում էին, որ  Հարությունյանը նոր համայնքապետ Դավիթ Սարգսյանի (վերջինս ևս «Քաղաքացիական պայմանագիր» կուսակցության անդամ է) ընկերն է, ինչի շնորհիվ Սարգսյանը հողատարածքի վրա նոր շինթույլտվություն է տվել նրան։

Երևանի «Իմ քայլը» խմբակցության ավագանու անդամ Վազգեն Դարբինյանի ղեկավարած «Ավա Գրանիտ» ՓԲԸ-ն 160 մլն դրամով գնել է Էջմիածնի կենտրոնական հրապարակի հարևանությամբ գտնվող նախկին «Գարուն» կինոթատրոնի շենքը և ցանկանում է տեղում բազմաֆունկցիոնալ բնակելի համալիր կառուցել: Էջմիածնի քաղաքապետարանի հարևանությամբ գտնվող, մարմարե սալերով, կամարներով ու մեծ ջահերով երկհարկանի շենքի տեղում նախատեսվող շինության էսքիզային նախագծի վերաբերյալ ապրիլի 18-ին հանրային քննարկում էր կազմակերպվել, որը վարում էր համայնքի ղեկավար Դիանա Գասպարյանը: Սակայն, Սբ. Մեսրոպ Մաշտոց փողոցի թիվ 107 շենքի բնակիչները դեմ են նախկին կինոթատրոնի  տեղում բազմահարկ շենք կառուցելու գաղափարին: Պնդում են, որ այդ տարածքում 5-հարկանի շենքեր կան, և բազմահարկ շենքի գոյությունը կարող է լուրջ դժվարություններ առաջացնել բնակիչների համար:

Երեւանի ավագանու «Իմ քայլը» դաշինքի անդամի ղեկավարած ՍՊԸ-ն Կենտրոնում խախտումներով շինարարություն է անում: «ՀԵՏՔ»-ը գրում է, որ  Բագրատ Մանուկյանն ու քույրը՝ Սրբուհի Մանուկյանը, բնակվում են Երևանի Այգեստան 2-րդ փողոց, 18 հասցեում։ «Ման Գրուպ» ընկերությունը, որի տնօրենը Երևանի ավագանու «Իմ քայլը» դաշինքի անդամ Վահե Օհանջանյանն է, նախորդ տարվա նոյեմբեր ամսին շինարարություն է սկսել նույն փողոցում գտնվող Այգեստան 2-րդ փողոց 16 և 16/1 հասցեներում։ Շինարարության հետեւանքով վնասվել է Մանուկյանների տունը, բակի բետոնապատ հատվածում առաջացել են ճաքեր։ 

Երևանի կենտրոնում՝ Օպերայի և բալետի թատրոնի հենց հարակից հատվածում, խաղային նոր ատրակցիոն է տեղադրվել: Ատրակցիոնը ուժային չափիչ ֆունկցիա ունի. հարվածում ես, և, ըստ սանդղակի, չափում է հարվածի ուժը: Մարդիկ գումար են վճարում և օգտվում դրանից: Ըստ մամուլի հրապարակումների՝ ատրակցիոնի իրական «տերը» Երևանի ավագանու անդամ Սերգեյ Գյոզալյանն է՝ իշխանական ՔՊ-ից:

Այսինքն՝ մի կողմից իշխանությունները պայքար են մղում ապօրինի շինարարության դեմ, մյուս կողմից չեն նկատում իրենց իսկ թիմակիցների կողմից որդեգրված նման վարքագիծը և նրանց քայլերը: