Նվաստացնել Արցախը պարզապես հակաաստվածային գործողություն է․ բոլորն էլ պատիժ են կրելու․ Դավիթ Բաբայան

«Կոչերը շատ լավ գնահատում ենք, բայց կոչերից պետք է անցնենք գործի, կոչերով հնարավոր չէ այս հարցը կարգավորել»,- ԼՈՒՐԵՐ.com-ի հետ զրույցում այս տեսակետը հայտնեց Արցախի ԱԳ նախկին նախարար Դավիթ Բաբայանը` անդրադառնալով այն հայտարարությանը, թե ԱՄՆ Սենատի արտաքին հարաբերությունների հանձնաժողովի նախագահ Բոբ Մենենդեսն ու սենատոր Ալեքս Պադիլլան պաշտոնական նամակ են հղել ՄԱԿ–ի Անվտանգության խորհրդում ԱՄՆ մշտական ներկայացուցիչ Լինդա Թոմաս-Գրինֆիլդին Լեռնային Ղարաբաղի հարցով․

«Ակնկալում ենք, որ անվտանգության խորհուրդը կնդունի պարտադիր որոշում և դա ոչ թե կլինի հերթական թղթի վրա ինչ-որ մի որոշում, որը Ադրբեջանը, բնականաբար, բանի տեղ չի դնելու։  Նաև հղի կին է մահացել, չեն կարողացել ժամանակին տեղափոխել հիվանդանոց, սա է իրավիճակը, որը իրոք կատաստրոֆիկ է և եթե միջազգային հանրության մոտ ինչ-որ  բարոյականություն և մարդասիրություն մնացել է՝ պետք է իսկապես գործեն, բայց մենք տեսնում ենք, որ Ադրբեջանը դիվանագիտական տարբեր կորպուսների, երկրների ներկայացուցիչներին էլի բերում է Աղդամ, ինչ-որ շոուներ է կազմակերպում։ Եթե այդքան մտահոգ են՝ թող  ասեն մինչև չբացեք ճանապարհը՝ մենք որևէ ձևով նման բաների չենք մասնակցելու»,-ասաց նա։

Բաբայանի խոսքով` Աղդամի ճանապարհը չպետք է որևէ ձևով փոխկապակցեն Բերձորի և Լաչինի ճանապարհի հետ, դրանք տարբեր բաներ են և եթե Աղդամի ճանապարհը փոխարինեն Բերձորի միջանցքով, ապա արցախցիները այլևս որևէ կապ՝ նույնիսկ տեսական, չեն ունենա Հայաստանի և աշխարհի հետ․ 

«Միայն մի լուծում է, որ մեզ համար անընդունելի է՝ դա Ադրբեջանի կազմում լինելն է, որովհետև դա նշանակում է, որ Արցախ չի լինելու․ սա է խնդիրը, մնացածը՝ ցույց կտա ժամանակը, իսկ լուծումների մասին մենք  բազմաթիվ անգամ խոսել ենք, դա կարող է լինել «Ստատուս քվո»-ի պահպանում, այսինքն՝ հարցը թողնել ապագային, որը Ադրբեջանը և Թուրքիան չեն ուզում ինչպես նաև որոշ այլ երկրներ, որովհետև սա աշխարհաքաղաքական է։ Արցախը այն երկիրը և այն ժողովուրդը չէ, որ կարելի է նման բաներ անել, մեր ներդրումը համաշխարհային ժողովրդավարության մեջ շատ մեծ է, շատ մեծ է Ռուսաստանի զարգացման գործում, անգնահատելի է հայ ժողովրդի պատմության մեջ և նվաստացնել Արցախը՝ պարզապես հակաաստվածային գործողություն է և բոլորն էլ պատիժը կրելու են այս կամ այն ձևով, բայց սա արդեն այլ խնդիր է, կարևորը այն է, որ գենաֆոնդը և երկիրը փրկվի»,- ասաց Դավիթ Բաբայանը և հավելեց` պետք է որոշում կայացնենք ազգովի և պետության միջնորդությամբ միայն․ այստեղ անթույլատրելի է անձնական որևէ նախաձեռնություն։ 

Զալիբեկյան Լիլիթ