ՄԱԿ-ի Անվտանգության խորհրդի նիստը չարդարացրեց մեր սպասելիքները․ Մհեր Հակոբյան

ԼՈՒՐԵՐ.com-ի  հետ զրույցում փորձագետ Մհեր Հակոբյանը` անդրադառնալով ՄԱԿ-ի Անվտանգության խորհրդի նիստին ասաց, որ վերջինս չարդարացրեց սպասելիքները, որ շատերս ունեինք,  բայց մյուս կողմից էլ այնպես անարդյունք չանցավ, ինչպես Ադրբեջանական կողմը այսօր առավոտվանից հռհռալով  ներկայացնում է։ 

«Ինչ-որ տեղ  միջին արդյունք եղավ, կուզեինք ավելի շատ լիներ, բայց  չեղավ։ Ֆրանսիայի, Մալթայի ելույթը շատ լավ ելույթ էր,  հաշվի առնելով դերակատարությունը Բրիտանիայի ելույթն էլ վատը չէր, ԱՄՆ ելույթը կարող էր ավելի լավը լինել, իսկ  Ալբանիան սպեցիֆիկ երկիր է  թուրքական և ադրբեջանական ազդեցությունը այնտեղ կա։ Եվ այդքանի մեջ բոլորը մեր օգտին չէր լինելու»,- ասաց նա 

Հակոբյանի խոսքով` լավ կլիներ, որ լիներ ինչ-որ բանաձևեր, բայց չկար, ինչը որոշակի հիասթափության ալիք է առաջացնում: Մյուս կողմից էլ  լավ էր, որ այդքանը եղավ,   մոտավորապես 55-60% արդյունք ունեցանք։ Մեր զրուցակցի խոսքով` պետք է սպասենք, արցախահայությանը ամրություն ցանկանանք, տեսնենք ՀՀ-ն ինչ կանի և միջազգային զարգացումները ինչի կբերեն։  

«Ռուսաստանի ելույթը մի քիչ բացասական եմ համարում, մի պետություն, որ ինքն է պատասխանատու այս իրավիճակի համար, որի զինված ուժերի հայացքի ներքո այս պահին արցախահայությունը սովամահության է ենթարկվում իմ կարծիքով բարոյապես ընդունելի չէր այդ անատամ ելույթը, որ ունեցավ»,- ասաց փորձագետը 

Մհեր Հակոբյանի խոսքով` այս պահին պետք է ուժեղանալ, պետական կառավարումը ուժեղացնել, իսկ ուժով ճանապարհ բացելը կբերի պատերազմի, որին ՀՀ-ն ոչ մի առումով պատրաստ չէ.  «Մեր երկրի ղեկավարության   անատամ քաղաքականությունն էլ բերեց նրան, որ  հայտնվել ենք փակուղու առաջ, որտեղ քայլ չունենք  անելու, ով որ գործադիրի բուրգի գագաթին է նա պետք է մտածի, բայց ցավոք  հայերս ենք տուժվում։  Բանակը չորս տարի է նորմալ տեսքի չբերեցին` քանդեցին, վերջի պատերազմից անցել է երեք տարի, ոչ մի բան չեն անում, բարոյահոգեբանական մակարդակը՝ անկումային, հասարակությունը` պառակտված: Այս պայմաններում ասել պատերազմ դա ելք չէ. վստահ չեմ, որ պաշտպանողական պատերազմում նորմալ կկռվենք, էլ չասած դիվանագիտական մակարդակը, երկրի ներսում քարոզը Թուրքիայի հետ խաղաղության՝ ազգային արժեքները, արժանապատվությունը մի կողմ դնելով»,- ավարտեց Մեր զրուցակիցը:

Լիլիթ Զալիբեկյան