Փոքր ակցիաներով գնալով դառնալու ենք համաժողովրդական շարժում. Լևոն Զուրաբյան

Այս փոքր ակցիաներով գնալով դառնալու ենք համաժողովրդական շարժում։ Լուրեր.com-ի հետ զրույցում ասաց ԱԺ ՀԱԿ խմբակցության ղեկավար Լևոն Զուրաբյանը՝ գնահատելով երեկ Վերաքննիչ դատարանի առջև կայացած ակցիան։

Նա նշեց, որ ակցիան հասարակական ընդվզում է և կազմակերպված է «Հայաստանն առանց քաղբանտարկյալների» նախաձեռնության կողմից։

«Սա ամենաամոթալի բանն է` խարան Հայաստանի վրա։ Ամոթալի է, որ Հայաստանում կան քաղբանտարկյալներ։ Դեռ մի քանի տարի առաջ մենք ազատվել էինք քաղբանտարկյալներին։ Սկսվել էր երկխոսություն, բայց հիմա նորից նահանջ է գնում։ Ստացվում է, որ Սերժ Սարգսյանն իր ռեժիմով հանդերձ ուղղակի ժամանակ ձգձգեցին, ցույց տվեցին իրենց բարի կամքի դրսևորումը, թե իբր բանակցում են ընդդիմության հետ, բայց ամբողջ ժամանակն օգտագործեցին ժողովրդի ճնշումը թուլացնելու վրա։ Իսկ հիմա նորից Հայաստանը նահանջում է քաղբանտարկյալների իրականություն»,-ասաց Զուրաբյանը և հավելեց, որ պետք է սկսենք պայքարել` դրա դեմն առնելու համար։

Զուրաբյանը նաև վստահություն հայտնեց, որ նախագահական ընտրությունների ժամանակ ակտիվացում է սկսվելու։

Անդրադառնալով նաև այն հանգամանքին, որ երեկ ոստիկանությունը ձերբակալել էր «Հակահարված» նախաձեռնության անդամներին, Զուրաբյանն ասաց. «Բոլորդ ճանաչում եք այդ տղաներին։ Բոլորդ գիտեք, որ նրանց ակցիաները կրում են քաղաքական-քարոզչական բնույթ, և բերման ենթարկելը հենց ՀԱԿ ակտիվիստների դատի օրը, ցույց է տալիս, որ կա քաղաքական հետապնդում»։

Զուրաբյանը նշեց նաև, որ դա նույնն է, ինչ ՀԱԿ այն ակտիվիստները, որոնց անցյալ տարվա օգոստոսի 9-ին ձերբակալեցին։

«Մեզ փորձեցին դա ներկայացնել որպես մի էպիզոդ, որտեղ բախվել են երիտասարդները և ոստիկանները, բայց իրականում այս 5 տարվա մեջ նույն այդ ոստիկանների մասնակցությամբ 30 նման էպիզոդ է եղել։ Մշտապես կամ իրենց ֆորմաներով, կամ քաղաքացիական համազգեստով, նրանք հաճախակի հարձակվել են ՀԱԿ ակտիվիստների վրա, երբ նրանք փորձել են իրազեկել Կոնգրեսի հանրահավաքների մասին, երբ իրենք «Երևան» հյուրանոցի դիմաց ուղղակի պաստառներ էին պահել` լուռ, հանգիստ, և ոստիկանությունն ուղղակի հարձակվեց նրանց վրա։ Սա մշտական ձեռագիր է Հայաստանում՝ կապված քաղաքացիական հասարակության հետ։ Ճիշտ է, արդեն ազատ են արձակել երկու ակտիվիստի, բայց այս մոտեցումն անհասկանալի է. մարդն իր համար քաղաքական ակցիա է իրականացնում, ինչո՞ւ եք մոտենում, ինչո՞ւ եք խանգարում, ի՞նչ գործ ունեք դուք խառնվելու մարդկանց սահմանադրական իրավուքների մեջ։ Նրանք չեն դիմանում, երբ մի երիտասարդ Սերժ Սարգսյանի նկարն է կպցնում պատին «Ճանաչի՛ր քո թշնամուն» գրառմամբ, միանգամից նյարդայնանում են վերից վար»,-ասաց Զուրաբյանը։

Գայանե Համբարձումյան