Փաշինյանն ու թիմակիցները այլևս կոռուպցիոն ռիսկ չեն տեսնո՞ւմ «Վեոլիա ջրի» թերացումների մեջ ( տեսանյութ)

Վերլուծական 17 Օգոստոս, 2023 21:18

Փաշինյանն ու թիմակիցները այլևս կոռուպցիոն ռիսկ չեն տեսնո՞ւմ «Վեոլիա ջրի» թերացումների մեջ ( տեսանյութ)

ՀՀ հանրային ծառայությունները կարգավորող հանձնաժողովում «Վեոլիա ջուր» ընկերությունից բողոքները հատկապես վերջին ամիսներին շատացել են։ Կառավարության նիստից հետո լրագրողների հետ զրույցում ճեպազրույցի ժամանակ այս մասին հայտնեց ՀԿԾՀ նախագահ Գարեգին Բաղրամյանը։ «Մենք ունենք վերահսկողության մեխանիզմներ, պարբերաբար բողոքներ ստանում ենք։ Միշտ ամառային ամիսներին բողոքներն անգամներով շատանում են, քանի որ խնդիրը հիմնականում սեզոնային է։ Ցանկացած բողոք ստանում է իր արձագանքը։ Մենք էլ ենք արձանագրում խնդիրներ, և դրանք առաջանում են, քանի որ համակարգում ներդրումային միջավայրը շատ սուղ է, և հիմա ներդրումների կարիք կա»,- նշեց Բաղրամյանը։

Նշենք, որ վերջին շրջանում հաճախակի են դարձել ջրանջատումները հատկապես ցերեկվա ժամերին։ Սա հանրության շրջանում բողոքի ալիք է բարձրացրել, քանի որ Հայաստանի որոշ հատվածներում օդի ջերմաստիճանն այս օրերին հասնում է +42–ի։

Սակայն, ուշագրավ է, որ օրինակ` 2018 թվականին վարչապետ Նիկոլ Փաշինյանը լրիվ այլ կերպ էր խոսում ստեղծված իրավիճակի մասին: Փաշինյանի` այդ ժամանակ հնչեցրած խոսքով՝ վերջին շրջանում այդ հարցը շարունակ բարձրաձայնվում էր, որպես օրինակ նա նշեց, որ սովորական խմելու ջրի կորուստը 60-70 տոկոս է կազմում, սա պայմանավորված է վատ մատակարարման հետ, ինքը ուզում է համաձայնել նաև կոռուպցիոն ռիսկերի հետ: «Վերջին շրջանի խնդիրները «Վեոլիա ջուր»-ը փորձում է կապել սաստիկ շոգերի հետ, պոմպի վթարի հետ, սակայն հուլիսին սաստիկ շոգը անսպասելի չպետք է լինի»,- նշել էր նա:

Ի՞նչ է ստացվում` այժմ Նիկոլ Փաշինյանն ու նրա կողմից նշանակված ՀԾԿՀ նախագահը որևէ կոռուպցիոն ռիսկ չեն տեսնում «Վեոլիա ջրի» գործողությունների մեջ, թե ինչպես ասում էր դասականը՝ կարևորը թղթերով ամեն ինչ նորմալ է...