«Արցախի ներկայիս նախագահը հանդիսանում է Նիկոլ Փաշինյան երկրորդը և նա հայտարարել է՝ ով դեմ է Փաշինյանին դավադիր ուժ է»

«Այսօր Արցախի ներքին քաղաքական կյանքը գտնվում է լարված վիճակում և այս ամենը անմիջապես ուղղորդվում և ղեկավարվում է Հայաստանի կողմից՝ Արցախի ներքին քաղաքական կյանքը քայքայելու և հակառուսական  տրամադրություններ գեներացնելու նպատակով,  իսկ Արցախի այսօրվա իշխանությունները հանդիսանում են  Հայաստանի Հանրապետության իշխանությունների կամակատարները»,- այս մասին ԼՈՒՐԵՐ․com-ի հետ զրույցում ասաց Արցախի «Արդարություն» կուսակցության գործադիր մարմնի անդամ Արմեն Պետրոսյանը՝ անդրադառնալով ԼՂ–ում տիրող իրավիճակին, որտեղ մի խումբ ակտիվիստներ փակել էին  ՌԴ խաղաղապահների շտաբի մուտքը` հայտարարելով խաղաղապահների անգործության և Լաչինի միջանցքի բացման հարցում անկարող լինելու մասին։ 

 «Բազմաթիվ մարդիկ   աշխատանքը կորցնելու պատճառով գտնվում են հուսահատ վիճակում և այդ հուսահատության մթնոլորտը օգտագործվում է։ Չնայած այն հանգամանքին, որ Արցախում ռազմական դրություն է և արգելված են ցույցերը, միտինգները և այլ ակցիաները, բայց Օսիպյան Արթուրի ակցիան իրականացվում է լրիվ պետական հովանավորչությամբ, այսքան ավտոբուսներ առանց պետական աջակցության հնարավոր չէ հանել հրապարակ՝ Ստեփանակերտի կենտրոն և այս ամենից ելնելով համոզվում ենք, որ այս ամենը  իրականացվում է ՀՀ իշխանությունների ծրագրով»,- ասաց նա  

Պետրոսյանի խոսքով՝ ռուս-ուկրաինական և հայ-ադրբեջանական պատերազմները նախագծվել, պլանավորվել և անց են կացվել այսպես կոչված կոլեկտիվ արևմուտքի (ԱՄՆ, Մեծ Բրիտանիա) կողմից նպատակ ունենալով չեզոքացնել Ռուսաստանի ազդեցությունը արևելյան Եվրոպայում և հարավային Կովկասում։ Նրա խոսքով առաջին փուլում Ուկրաինայում և Հայաստանում արևմուտքը կազմակերպել է գունավոր հեղափոխություններ և իր կամակատարներին կարգել իշխանության ղեկին: 

«Արցախի լինել կամ չլինելու հարցն է,  ինչու չէ նաև Հայաստանի,  որովհետև առանց Արցախի Հայաստանը  չի կարող լինել և բնականաբար Հայաստանը արդեն ոչ մեկին պետք չի լինելու և կդառնա մի կետ, որտեղից կօգտվեն Թուրքիան և արևմտյան այլ ուժերը։ Եթե մենք ասում ենք ՆԱՏՕ և Արևմուտք  ՀՀ շարքային քաղաքացին  պետք է հասկանա, որ Հայաստանի Հանրապետությանը  դեպի Եվրոպա տանող դուռը դրված է Ստամբուլում, եթե նրանք ուզում են նորից թուրքին բերել Հայաստան կարող են ընտրել, պահպանել, պաշտպանել  Նիկոլի իշխանությանը»,- ասաց մեր զրուցակիցը 

Արմեն Պետրոսյանի խոսքով՝ այսօր ներքին լսարանին  հայտնել են, որ Արցախի նախագահը պետք է հրաժարական տա և ինքը կարծում է, որ  միգուցե նոր եկած ուժը կարողանա հակադրվել Հայաստանի իշխանություններին և չթույլատրել Արցախի վերջնականապես հանձնելու Հայաստանի իշխանությունների ծրագիրը, որովհետև ներկայիս Արցախի նախագահը հանդիսանում է Նիկոլ Փաշինյան երկրորդը և նա հայտարարել է՝ ով դեմ է Նիկոլ Փաշինյանին դավադիր ուժ է։ 

«Այս օրերին շատ են հատուկ ուժերի կողմից ուղղորդված քննադատությունները արցախցիների նկատմամբ։ Լավ օրից չէ, որ արցախցին տան վերջին անասունը մորթում ու նկուղում պահած վերջին պահածոն բացում և համեմատաբար ճոխ սեղան է գցում իր երեխու ծնունդը նշելու համար: Նա գիտի, որ վաղը կարող է նույնիսկ մի կտոր հաց չունենալ, բայց ապրում է  «այսօրով», քանի որ նրա ապագան գողացել են «ապագա կա» խոստացողը ու նրա հետնորդները։  Սովորաբար այն ծնողը, որը չի կատարում պարտականությունները զրկվում է ծնողական իրավունքներից և առանց իր զավակ Արցախի Հայաստանը զրկվելու է ամեն ինչից»,- եզրափակեց մեր զրուցակիցը:

Լիլիթ Զալիբեկյան