Ադրբեջանում մեղադրանք է առաջադրվել պահեստազորային Գագիկ Ոսկանյանին

Քարվաճառում ադրբեջանցի զինվորականների կողմից գերեվարված պահեստազորային Գագիկ Ոսկանյանին մեղադրանք է առաջադրվել Ադրբեջանում։

Ադրբեջանի գլխավոր դատախազությունը Գագիկ Ոսկանյանին որպես մեղադրյալ պատասխանատվության է ենթարկել հետևյալ հոդվածներով.

▪️ մաքսանենգություն, որը կատարվել է մի խումբ անձանց կողմից նախնական պայմանավորվածությամբ

▪️ ահաբեկչություն, որը կատարվել է մի խումբ անձանց կողմից նախնական պայմանավորվածությամբ, կազմակերպված խմբի կամ հանցավոր միավորման միջոցով,

▪️ ահաբեկչություն, որը կատարվել է հրազենի և որպես զենք օգտագործվող իրերի կիրառմամբ,

▪️ Ադրբեջանի Հանրապետության սահմանի ապօրինի հատում։

Ոսկանյանի նկատմամբ դատարանը խափանման միջոց է ընտրել կալանավորումը։

Հիշեցնենք, որ օգոստոսի 16–ին ՀՀ ՊՆ–ն նախ հայտնեց, որ պահեստազորային Գ. Ո.-ն, նախնական տվյալներով, ինքնակամ թողել է մարտական դիրքը։ Սրան հաջորդեց Բաքվի հայտարարությունը, թե իբր Քելբաջարի ուղղությամբ դիվերսիոն ներթափանցման փորձ է եղել, հրազեն կիրառելով իրենց հաջողվել է կասեցնել այն, վիրավորված զինծառայողը ձերբակալվել է։

Ավելի ուշ Երևանը հերքեց մեղադրանքները՝ այն բացարձակ սուտ որակելով, հաղորդագրության հետ Պաշտպանության նախարարությունը մի տեսանյութ հրապարակեց, որտեղ երևում էր, թե ինչպես են մի քանի զինվորականներ նրան մեքենա նստեցնում ու հեռանում տարածքից: Ռազմական գերատեսչությունը տեղեկացրեց, որ քննում են Գագիկ Ոսկանյանի՝ ադրբեջանական կողմում հայտնվելու վարկածն ու մյուս հանգամանքները։