Ինչպես են ՔՊ-ականները «շահում» հպարտ քաղաքացիների սիրտը

 ՏԻՄ ընտրություններից հետո իրավապահ մարմինները ակտիվորեն տարածում էին հաղորդագրություններ, համաձայն որոնց` կալանավորվել են 2021 թվականի խորհրդարանական և վերջին ՏԻՄ ընտրությունների ընթացքում ընտրակաշառք բաժանած անձինք: Սա, իհարկե, անչափ դրական տենդենց է, քանի որ ընտրակաշառքի դեմ պայքարը արդար ընտրական ինստիտուտ ունենալու գլխավոր երաշխիքն է:

Սակայն, կա մեկ ուշագրավ հանգամանք, չգիտես ինչու, կալանավորված անձանց շրջանում բոլորն անխտիր ընդդիմադիր քաղաքական ուժերի ներկայացուցիչներ են, և կարող է տպավորություն ստեղծվել, որ իշխող քաղաքական ուժն ընդհանրապես ընտևակաշառք չի բաժանել: Մինչդեռ ընտրություններից առաջ և դրանց ընթացքում բազմաթիվ ահազանգեր էին հնչում` կապված հենց ՔՊ-ականների կողմից կատարվող ապօրինությունների մասին:

Գյումրիի քաղաքապետի ՔՊ-ական թեկնածու Հովհաննես Հարությունյանը օրը ցերեկով 50 հազար դրամ էր բաժանում՝ սոցաջակցության անվան տակ:

Նոյեմբերյանի ՔՊ ցուցակի 1-ին համար, Նոյեմբերյան համայնքի ղեկավար Կարեն Աբազյանը բազմաթիվ որոշումներով քաղաքացիներին տրամադրել է ֆինանսական օգնություն և ցեմենտ։

Համացանցում տեսանյութ էր տարածվել, որտեղ երևում էր, որ Արգավանդ համայնքից ՔՊ-ական ավագանու ցուցակում առկա Էվելինա Ոսկանյանն ակնհայտ ընտրակաշառք է բաժանում:

«Ընտրությունների վերահսկման կոմիտեի» կողմից համացանցի մշտադիտարկման արդյունքում հայտնաբերվել է «Վանաձորի բժշկական կենտրոն» ՓԲԸ տնօրեն, «Քաղաքացիական պայմանագիր» կուսակցության պատգամավորի թեկնածու Վահագն Մկրտչյանի գրառումն այն մասին, որ նույն կուսակցության պատգամավորի երկու այլ թեկնածուների (մարզպետի և առողջապահության նախարարի պաշտոնակատարի) օժանդակությամբ, հունիս ամսից 10-20%-ով բարձրացվել է Բժշկական կենտրոնի շուրջ 370 աշխատակցի աշխատավարձ։

Գարիկ Սարգսյանը Վեդիի ընտրություններից առաջ սոցիալական աջակցության անվան տակ 5-6 մլն դրամի փող է դուրս գրել համայնքային բյուջեից:

Տեղեկություն էր տարածվել նաև, որ Վանաձորի 22 դպրոցի մոտ «ՔՊ»-ն փող է բաժանում։ Այդ մասին հայտնում էր «armbigbrother» տելեգրամյան ալիքը։ Հիշեցնենք՝ Վանաձորում ՔՊ քաղաքապետի թեկնածուն Լոռու մարզպետ Արամ Խաչատրյանն էր: Վերջինիս մասնակցությունը կամ կապը այս դրվագի հետ այդպես էլ չստուգվեց պատկան մարմինների կողմից:

Երեկ էլ Նիկոլ Փաշինյանը Սյունիք կատարած իր այցի ընթացքում երեխաներին բացահայտ սմարտֆոններ է բաժանել՝ սյունեցիների սիրտը շահելու նպատակով:

Հարց է առաջանում՝ իսկ այս բոլոր երևույթները պատկան մարմինները ինչպես կանվանեն և արդյո՞ք հասարակությունը կարող է վստահ լինել, որ կոռուպցիան և կաշառքը Հայաստանում ի սպառ վերացել են, եթե շարունակում ենք ականտես լինել նման էպիզոդների...