Վահագն Խաչատուրյանը Շիրակի մարզպետին պարգևատրել է Համահայկական խաղերի ոսկե մեդալով

«Միասնություն սպորտով» կարգախոսով Համահայկական 8-րդ ամառային խաղերն ավարտված են։

Շիրակի մարզպետ Մուշեղ Մուրադյանը պարգևատրվել է «Համահայկական խաղերի 25-ամյակի ոսկե մեդալով», հայտնում են մարզպետարանից։ 

35 ոսկի, 26 արծաթ և 47 բրոնզ` Շիրակի մարզը նվաճեց 108 մեդալ։

Լավագույն քաղաք անվանակարգում հաղթեցին Արթիկն ու Լոնդոնի թիմը։

Մրցումներին մարզից մասնակցեցին Գյումրի, Արթիկ, Անի, Ախուրյան, Աշոցք և Ամասիա համայնքների թիմերը՝ շուրջ 300 մարզիկներով։ Ծրագրում ընդգրկված 19 մարզաձևերից մարզի ներկայացուցիչները հանդես եկան 17-ում/մասնակցություն չեղավ գոլֆ և կանանց ֆուտբոլ մարզաձևերում/։

Շիրակի մարզում անցկացվեցին սպորտային պարերի մրցաշարը, ինչպես նաև ֆուտբոլ, բասկետբոլ և վոլեյբոլ մարզաձևերի ենթախմբային փուլերի մրցումները՝ Գյումրիում, Արթիկում և Ամասիայում։ Ընդհանուր հաշվարկում մարզի ներկայացուցիչները նվաճեցին 108 մեդալ, որից 35` ոսկի, 26` արծաթ և 47` բրոնզ։

Արարողությանը ներկա են եղել ՀՀ նախագահ Վահագն Խաչատուրյանը, Վարչապետի աշխատակազմի ղեկավար, Համահայկական ամառային 8-րդ խաղերի կազմակերպման և անցկացման կազմկոմիտեի նախագահ Արայիկ Հարությունյանը, կառավարական կազմկոմիտեի անդամներ, ՀԽՀԿ ներկայացուցիչներ և Համահայկականին մասնակցած մարզիկներ, պատվիրակությունների անդամներ։

«Միասնություն սպորտով» կարգախոսի ներքո Համահայկական 8-րդ խաղերը 2 շաբաթով Հայաստանում էին միավորել 41 երկրների 181 քաղաքների ավելի քան 7000 մարզիկների։ 8 երկիր առաջին անգամ էր ներկայացուցիչ ունենում խաղերում։