Տեղի է ունեցել վարչապետի որոշմամբ ստեղծված աշխատանքային խմբի նիստը՝ ուղղված հրդեհների կանխարգելմանը

Օգոստոսի 24-ին Ներքին գործերի նախարարության փրկարար ծառայությունում տեղի ունեցավ ՀՀ վարչապետի «Աշխատանքային խումբ ստեղծելու և դրա կազմը հաստատելու մասին» № 817-Ա որոշմամբ ստեղծված աշխատանքային խմբի երկրորդ նիստը՝ ՀՀ-ում անտառային հնարավոր հրդեհավտանգ իրավիճակների մշտադիտարկման, հրդեհների կանխարգելման, անհրաժեշտ կարողությունների գնահատման, արագ արձագանքման, հրդեհների դեմ պայքարի, դրանց տարածման կանխման, ինչպես նաև դրանց հետևանքների վերացմանն ուղղված միջոցառումների իրականացման նպատակով:

Նիստին մասնակցում էին ՆԳՆ փրկարար ծառայության, ինչպես նաև այլ շահագրգիռ գերատեսչությունների ներկայացուցիչները:

Ողջունելով ներկաներին, աշխատանքային խմբի ղեկավար, Փրկարար ծառայության տնօրեն-Ներքին գործերի նախարարի տեղակալ, փ/ծ գնդապետ Կ.Ցուցուլյանը նշեց, որ առաջին հանդիպումից մինչ այսօր իրականացվել են անտառային և բուսածածկ տարածքներում հրդեհների առաջացման, տարածման վտանգի կանխարգելման, դրանց հետևանքով բնակչությանը, բնությանը հասցվող վնասների ռիսկերի նվազեցման ու հանրային իրազեկման լայնածավալ աշխատանքներ։

Փրկարար ծառայության կողմից հանրային իրազեկման աշխատանքներում ներգրավվել են 643 օպերատիվ խմբեր՝ ընդհանուր 1504 փրկարարական ծառայողներով։ Թվով 5751 օբյեկտներում ու անտառամերձ հանրային վայրերում իրականացվել են հանրային իրազեկման աշխատանքներ, փակցվել են 8436 պաստառներ՝ հակահրդեհային կանոնների պահպանման վերաբերյալ։ Անտառամերձ տարածքներում 816 փրկարարական ծառայողներով կազմակերպվել է հերթապահություն։

Նիստի ընթացքում մասնակիցները ներկայացրեցին իրենց կողմից կատարված աշխատանքները, որոնց շրջանակներում իրականացվել են մարզային այցելություններ, հնարավոր հրդեհներին արձագանքման նպատակով նախապատրաստական աշխատանքներ անտառտնտեսություններում, տեղերում ստուգվել են անտառային և բնության հատուկ պահպանվող տարածքներում հրդեհի արձագանքման պլանները, մարդաշատ վայրերում փակցվել են պաստառներ հրդեհային կանոնների պահպանման վերաբերյալ, սահմանվել են հերթապահություններ, հանդիպումներ են տեղի ունեցել ՏԻՄ-երի ղեկավարների հետ և այլն:

Հատուկ անդրադարձ եղավ նաև անտառամերձ հատվածներում փայտածուխի արտադրամասերի գործունեությանը: Առաջարկվեց առկա օրենսդրական դաշտի սահմաններում գործընթաց ծավալել անտառամերձ տարածքներից դրանց տեղափոխման ուղղությամբ:

Քննարկման ընթացքում ի թիվս այլ հարցերի որոշվեց ավելի ակտիվ իրականացնել հանրային իրազեկման, հերթապահության և մշտադիտարկման ուղղությամբ համատեղ միջոցառումները: