Երևանի քաղաքապետարանը համայնքային ոստիկանություն ստեղծելու ծրագիր ունի

Երևանի քաղաքապետարանը համայնքային ոստիկանություն ստեղծելու ծրագիր ունի։ Հանրային հեռուստաընկերությանը տված հարցազրույցում Երևանի քաղաքապետ Տիգրան Ավինյանն ասել է, որ քաղաքապետարանն ունի շատ տարանջատված վարչություններ, որոնք պետք է միավորվեն։

«Երևանն ունի տարբեր վարչություններ՝ հասարակական կարգի պահպանման վարչություն, քաղաքաշինության և հողի վերահսկողության վարչություն, գովազդի և առևտրի վարչություն և այլն, որոնք պետք է միավորվեն, դրանք ունեն այսպես ասած՝ ոստիկանական գործառույթներ, և այս ամենը կոնսոլիդացնելու խնդիր կա մեկ ծառայության ներքո։ Ուղղակի մենք ունենք շատ տարանջատված վարչություններ, ամեն մեկն իրականացնում է քաղաքականություն, բայց շատ դեպքերում դրանք խաչվում են իրար հետ, և համակարգված չեն»,- նշել է նա։

Դիտարկմանը, որ նման ծառայության ստեղծումը «թանկ հաճույք է» Ավինյանն արձագանքել է. «Եթե մենք ունենք այդ ծառայությունները ինչ-որ կերպ պահում ենք չէ՞ այդ ծառայությունները, դրանք անհրաժեշտություն են»։