Նախընտրական էնտրոպիան և ԲՀԿ-ի «Ակունա Մատատա»-ն

Չնայած նրան, որ ողջ քաղաքական անգործ պլատֆորմն այսօր սրտատրոփ սպասում է ԲՀԿ-ից մի որևէ, գոնե լուրջ, ուղորդող քայլի, ԲՀԿ-ական պատգամավոր Նաիրա Զոհրաբյանը «Ակունա Մատատա» սկզբունքով հանդես է գալիս հայտարարությամբ, մասնավորապես նշելով, որ անհրաժեշտ բարեփոխումների իրականացման ճանապարհներից մեկը կարող է լինել անցումը կառավարման խորհրդարանական համակարգին, այնուհետև հավելելով, որ առաջիկա օրերի ընթացքում ԲՀԿ-ն խորհրդակցություններ է սկսելու քաղաքական ուժերի հետ՝ տեսնելու, թե արդյոք կա հնարավորություն համախմբվելու ահա այս գաղափարի շուրջ: Այստեղ են ասել՝ «Բարև Ձեզ», տիկի՛ն Զոհրաբյան, երբ ժամանակին Ձեր գործընկերներն ի դեմս «Ժառանգության» և ՀՅԴ ներկայացուցիչների ԱԺ-ում ապահովում էին քվեներ նույն օրինագծի համար, չգիտես ինչու, ԲՀԿ պատգամավորների մի մասը դեմ էր քվեարկում։ Այդ ի՞նչը փոխվեց, որ այսօր նոր հասկացաք նման կառավարման ձևի ավելի օպտիմալ լինելը մեր երկրի համար։ Այս հարցին սպառիչ պատասխանը տվեց ՀՀԿ խոսնակը՝ իհարկե, արտահայտելով Սերժ Սարգսյանի միտքը՝ «կառավարման խորհրդարանական համակարգի անցման առաջարկություններով հանկարծահաս հանդես եկողների հետևում չտեսնել մարդկանց, որոնք որևէ այլ կերպ, սեփական դեմքով, առանց շղարշվելու իշխանության գալու հնարավորություն չունեն, առնվազն քաղաքական կարճատեսություն է: Սա ավելի քան ակնհայտ է: Պարզունակ քայլ է և ակնհայտ՝ որտեղ մշակված»:

Այս՝ առաջին հայացքից առեղծվածային ու դյութիչ բառերով պճնված պատասխանը նվազագույնը հաճելի կարող է թվալ ունկդիրներին, բայց չի կարելի խաբվել սրանցով և թերագնահատել հայտարարությունում առկա քաղաքական դաշտին հատուկ գայլային ոգին, որով ՀՀԿ-ն, իսկական գիշատչի նման պատսպարվելով, հարվածում է հեռվից՝ առանց ավելորդ ռիսկերի պատասխան ստանալու։ Այսինքն ՀՀԿ-ն հստակ ցուցադրում է ամեն ինչից տեղյակ լինելու իր առավելությունն ու հայտարարում, որ գիտի, թե ԲՀԿ-ի հայտարարությունը որտեղ է մշակված, ուղղակի չի բացահայտում անձեր, հուսալով, որ անձերն իրենք իրենց կբացահայտեն՝ հակառակ դեպքում էլ հստակ գիտակցելով, որ իրենք այսպես թե այնպես ջրից չոր են դուրս գալու։

Այն, որ ՀՀԿ-ն այս պատասխանով հենց «սեզամում» պահ մտած Ռոբերտ Քոչարյանին է փորձում հրապարակ քաշել, դա ակնհայտ է։

Իսկ այս պարագայում Ռոբերտ Քոչարյանն ունի երկու տարբերակ՝ կամ տալ համարժեք պատասխան, կամ, ինչպես ասում են, այս ճակատամարտում ստիպված կուլ գնալ, ինչը ՀՀ երկրորդ նախագահին սազական չի լինի, ու, հավատացե՛ք, անգամ այստեղ կարևոր չի՝ ԲՀԿ-ի լծակներով կտրվի պատասխանը, թե՝ ոչ։

Իսկ ԲՀԿ-ի՝ Շարմազանովի բնութագրմամբ պարզունակ քայլերն ընդամենը ժամանակ ձգելու ու համաձայնության որոշակի եզրեր գտնելու միտում ունեն, կամ ԲՀԿ-ի սատարող ուժերով և թատերաբեմ նետված առաջարկով Սերժ Սարգսյանի առջև մինչև նախագահական ընտրությունները պայմաններ դնելն է, որի ամենավառ ու ցանկալի տարբերակը կլինի վարչապետի պաշտոնը պահանջելը՝ շատ լավ հասկանալով, որ «Տիգրան Սարգսյանի առաջարկած» փոխվարչապետի պաշտոնը ոչինչ է վարչապետի՝ այսինքն գործադիր իշխանության դիմաց։ Շնորհիվ ԲՀԿ-ի՝ այսօր արդեն Հայաստանում առկա գործոնի՝ թե այն որքան է լուրջ, և որքան՝ անլուրջ, ժամանակը ցույց կտա։ Ռոբերտ Քոչարյանը փորձելու է վերածնվել, բայց այս անգամ շղարշված սեփական դեմքով, և ստանալ Սերժ Սարգսյանից բաղձալի գործադիր իշխանությունը։

 Գևորգ Ավետիսյան