ԱՄՆ-ն չի պատրաստվում արդարացնել թուրքերի սպասելիքները

Անկարայի կառավարությունը հույս է հայտնում, որ ԱՄՆ-ում նախագահական ընտրություններից հետո Վաշինգտոնն իր աջակցությունը կհայտնի Թուրքիային հարևան Սիրիայի դեմ պայքարում: Սակայն Բարաք Օբաման դժվար թե իրականացնի Թուրքիայի բոլոր սպասումները. գրում է Deutsche Welle-ն:

Թուրքիայի վարչապետ Ռեջեփ Թայիփ Էրդողանը դեպի Ինդոնեզիա կատարած իր այցի ժամանակ էր տեղեկացել Օբամայի վերընտրության մասին: Նա շնորհավորել է ԱՄՆ-ի նախագահին՝ նշելով նրան որպես Թուրքիայի հուսալի դաշնակից: Էրդողանն արտահայտել է իր մի քանի ցանկությունները, որոնք նա կուզենար իրագործված տեսնել Օբամայի կողմից: ԱՄՆ-ում երկար ժամանակ տևող նախընտրական քարոզարշավի պատճառով թուրքական կառավարությունը չէր անհանգստացնում Օբամային հարևան Սիրիայի դեմ մղվող պայքարում: Բալի ժամանելով, սակայն, Էրդողանը հույս է հայտնել, որ այժմ ամեն բան պիտի փոխվի: Թուրքիան մտադիր է ճնշում գործադրել ԱՄՆ-ի վրա՝ պահանջելով նրա կտրուկ միջամտությունն այդ հարցում՝ ի աջակցություն Թուրքիայի: «ԱՄՆ-ը պետք է իրեն լրիվ այլ կերպ պահի Սիրիայի հարցում»,-պնդում է վարչապետ Էրդողանը:

Թուրքական և ամերիկյան պետական պաշտոնյաներն արդեն կարծես թե քննարկումներ են սկսել թուրք-սիրիական սահմանին «Patriot» տիպի զենիթային հրթիռների տեղակայման հարցում: Թուրքիայի ԱԳ նախարար Ահմեդ Դավութօղլուն հայտարարել էր, որ ՆԱՏՕ-ի անդամ հանդիսացող Թուրքիան կարող է Սիրիայի հակամարտության հարցում ՆԱՏՕ-ից «Patriot» տիպի հրթիռային աջակցություն ստանալ:
Սակայն Էրդողանի կառավարությունը չպիտի հույսեր փայփայի, որ Սիրիայի հարցում մինչև այս պահը զսպվածություն ցուցաբերող ԱՄՆ-ը  180 աստիճանով կտրուկ փոխելու է իր քաղաքականությունը. գրում է գործակալությունը: ԱՄՆ-ի կողմից ուղղակի ռազմական միջամտությունը շարունակում է բացառված մնալ: Ուստի իր վերնընտրությունից հետո նախագահ Օբաման պատրաստվում է ձեռնպահ մնալ տարածաշրջանում  անհայտ ելքով այդ պատերազմից: Այդ պատճառով «ԱՄՆ-ի բոլորովին այլ մոտեցումը Սիրիայի հարցում» չի կարող արդարացնել թուրքերի բարձր սպասելիքները: