Կոչ արեցին լրագրողներին լինել ավելի միասնական

Վիրավորանքի եւ զրպարտության հոդվածի ապաքրեականացումն ընդունվել է քաղաքացիական հասարակությանը պաշտպանելու նպատակով: Մինչդեռ «Հրապարակ» օրաթերթի գլխավոր խմբագիր Արմինե Օհանյանի համոզմամբ, դրանից օգտվում են միայն օլիգարխները:

«Նրանք գայթակղվելով դատարաններում ունեցած հաջողություններից, շարունակում են անընդմեջ դատական հայցեր հարուցել իշխանության կողմից չվերահսկվող թերթերի դեմ»,- ասաց խմբագիրը:  Խոսելով «օլիգարխների շահերն էլ ավելի պաշտպանող օրենքից», թերթի խմբագիրը այսօր լրագրողների հետ հանդիպմանը ներկայացրեց մինչ օրս լրատվամիջոցների դեմ դատական հայց ներկայացրած օլիգարխներին ցանկը՝ Տիգրան Արզաքանցյան, Լեւոն Սարգսյան, Միկա Բաղդասարով, Ռուբեն Հայրապետյան, Ռոբերտ Քոչարյան:

«Հրապարակ» օրաթերթի խմբագիրը նշեց, որ ամեն օր վախով է ստուգում փոստը, քանի որ այնտեղ կարող են նոր հայցեր հայտնաբերվել: «Արդեն 3 հայց ունենք, եւ 3 սպառնալիք՝ նոր հայցերի»,- ասաց նա:

«Ժամանակ» թերթի գլխավոր խմբագիր Արման Բաբաջանյանն էլ համոզված է, որ օրենքի փոփոխությունը կատարվել է նախագահականից հնչած հրամանով: 3 հայց էլ ներկայացվել է «Ժամանակ» թերթի դեմ:

Խոսքի ազատության պաշտպանության կոմիտեի նախագահ Աշոտ Մելիքյանը նկատեց, որ վիրավորանքի եւ զրպարտության հոդվածը հաստատելու համար, անհրաժեշտ է լավ դատական համակարգ:

«Լավ դատական համակարգի պարագայում, հանգիստ կարելի է ապացուցել, որ իրականում պետք է պատժվի զրպարտողն ու վիրավորողը, մինչդեռ մենք ականատես ենք լինում, որ օլիգարխն է հայհոյում լրագրողին, որը վիրավորանք չի գնահատվում։ Իսկ եթե լրագրողն իր հոդվածում վկայակոչում է «այլ աղբյուր», նրա դեմ կարելի է լինում դատարան դիմել եւ հաղթել»,- ասաց նա:

Ընդդիմադիր թերթերի խմբագիրները եւ Խոսքի ազատության պաշտպանության կոմիտեի նախագահը կոչ արեցին լրագրողներին՝ լինել ավելի միասնական։ Արմինե Օհանյանը առաջարկեց. «վիրավորված օլիգարխի նկարը բոլոր թերթերում տպագրել՝ սեւ շրջանակում»: Արման Բաբաջանյանն էլ առաջարկեց բոլոր թերթերում տպագրել այն նյութը, որի համար դիմել են դատարան: