Վիեննայում վճիռ է կայացվում Ստրադիվարիուսի ջութակների աղմկահարույց գործով

Վիեննայի դատարաններից մեկում ուրբաթ օրը պետք է վճիռ կայացվի Ստրադիվարիուսի ջութակների խարդախության աղմկահարույց գործով. հաղորդում է BBC-ն։ Հազվագյուտ ջութակների հայտնի փորձագետ Դիտմար Մահոլդը խոստովանել է, որ երաժշտական գործիքների հետ կապված խարդախություններ է իրականացրել։ Այս գործը համարվում է պատմության մեջ խարդախության ամենախոշոր դեպքերից մեկը։ Ըստ հետաքննության տվյալների՝ Մահոլդը բազմիցս վերցրել է խոշոր բանկային վարկեր՝ որպես գրավ ներկայացնելով տարբեր հազվագյուտ երաժշտական գործիքներ։

Ըստ դատախազների տեղեկությունների՝ այս գործիքներից մի քանիսը կեղծ են։ Նաև հայտնի է դարձել, որ ճարպիկ փորձագետը շատ հաճախ տարբեր բանկերին միաժամանակ տրամադրել է միևնույն գործիքը, որի գինը մի քանի միլիոն եվրո է կազմում։ Եթե նա մեղավոր ճանաչվի, նրան սպառնում է 10 տարի ազատազրկում։