«Հարսնաքար»-ի գործով հանձնաժողով չի ստեղծվի. Նախագիծը մերժվեց

Օգոստոսի 31–ին ԱԺ «Ժառանգություն» խմբակցության պատգամավորներ Զարուհի Փոստանջյանը, Ռուբիկ Հակոբյանը և Ալեքսանդր Արզումանյանը ԱԺ էին ներկայացրել նախագիծ ժամանակավոր հանձնաժողով ստեղծելու մասին։

Այսօր ԱԺ-ում Պետական-իրավական հարցերի մշտական հանձնաժողովի նիստի ժամանակ քննարկման դրվեց նախագիծը։

«2012թ. հունիսի 17-ին Երևանի «Հարսնաքար» ռեստորանային համալիրում ՀՀ Պաշտպանության նախարարության մի խումբ սպաներին դաժան ծեծի ենթարկելու, նրանցից մեկին կյանքից զրկելու հանգամանքների, ինչպես նաև 2001թ. սեպտեմբերի 25-ին տեղի ունեցած Պողոս Պողոսյանի սպանությունից հետո առավել արմատավորված անպատժելիության և ամենաթողության համար պատասխանատու և մեղսակից գործող ու պաշտոնաթող բարձրաստիճան պաշտոնյաների, նրանց հետ առնչություն ունեցող անձանց մասնակցությամբ տեղի ունեցած կյանքի և առողջության դեմ հանցագործությունների ուսումնասիրության միջոցով ՀՀ Ազգային ժողովին եզրակացություն ներկայացնելու համար ժամանակավոր հանձնաժողով ստեղծելու մասին»։

ԱԺ ՀՀԿ խմբակցության քարտուղար Հովհաննես Սահակյանը, անդրադառնալով նախագծին, հարցրեց, թե ինչու են ընտրել հենց այս հանգամանքները՝ Պողոս Պողոսյան, Վահե Ավետյան։

Ի պատասան՝ Փոստանջյանն ասաց, որ այն օրվանից, երբ Իշխանության ներկայացուցչի թիկնապահի կատարած հանցագործությունը չպատժվեց, այդ օրվանից ՀՀ–ում արամատավորվեց անպատժելիությունը, որն էլ բերեց Վահե Ավետյանի սպանությանը։

Զարուհի Փոստանջյանի նախաձեռնությանն անդրադարձավ նաև ԱԺ ՀԱԿ պատգամավոր Գագիկ Ջհանգիրյանը և նշեց, որ, բնականաբար, ՀԱԿ-ը կողմնակից է եղել այս նախագծի ստեղծման գաղափարին և դեռ մի քանի ամիս առաջ նախաձեռնել է արտահերթ նիստ, որին միացել էին ԲՀԿ-ից մի քանի պատգամավորներ, ՀՅԴ-ն, «Ժառանգություն»-ը։

«Այն ժամանակ հիմնավոր փաստարկներից մեկը կապվում էր պատգամավորներից մեկի անվան հետ և հանձնաժողովի ստեղծման գաղափարն ակտուալ էր. արդյոք դուք կամ ձեր խմբակցությունը քննարկե՞լ է մյուս խբակցությունների հետ, քանի որ այն երեք–չորս քաղաքական ուժի նախաձեռնությունն էր»,-Փոստանջյանին հարց ուղղեց Ջհանգիրյանը։

«Իհարկե, քննարկումներ տեղի ունեցել են»,-ասաց Փոստանջյանը, ինչին ի պատասխան՝ Ջանգիրյանն ասաց, որ ինքը կողմ է քննարկելու նախագծին։

ԱԺ անկուսակցական պատգամավոր Էդմոն Մարուքյանը ևս նշեց, որ կողմ է քվեարկելու նախագծին։

Հարակից զեկուցող ՀՀԿ-ական Հովհաննես Սահակյանը նշեց, որ փորձել է նախագծի ենթատեքստը և նպատակը տեսնել և հավելեց, որ սա քաղաքական շահարկում է։

«Հարսնաքար»-ի գործով հանձնաժողով ստեղծել դատաքննության փուլում կարծում են իրավական առումով ճիշտ չէ»,-ասաց Սահակյանը։

Փոստանջյանը նշեց, որ Մարտի 1-ին միառժամանակ գործեց և՛ հանձնաժողովը, և՛ փաստահավաք խումբը, բայց ոչ ոք չասաց, որ դա հակասում է Սահմանադրությանը։ 

«Պաշտոնաթող Ռոբերտ Քոչարյանին, Ռուբեն Հայրապետյանին պետք է հրավիրենք և նրանցից բացատրություններ լսենք»,-ասաց Փոստանջյանը։

Նախագիծը դրվեց քննարկման և մերժվեց։ Դեմ քվեները գերազանցեցին։ Նշենք, որ ԲՀԿ-ական Տիգրան Ուրիխանյանը քննարկման ժամանակ դահլիճում չէր։ 

Զարուհի Փոստանջյանն այս հանգաանքին արձագանքեց. «Ուրիխանյանը թռա՞վ»։