Սաֆարյանը՝ Բագրատյանին. Ո՞վ խոսի, գոնե դուք լռե՛ք. Հիշում ենք Ձեր կառավարման տարիները

«Ժառանգության» վարչության քարտուղար Ստյոպա Սաֆարյանն օրեր առաջ լրագրողների հետ հանդիպմանը կարծիք էր հայտնել, որ «նախագահական ընտրություններում Լևոն Տեր-Պետրոսյանի առաջադրումից վնասներն ավելի շատ կլինեն, քան օգուտը»։

Ըստ «Իրավունք» օրաթերթի հրապարակման՝ ԱԺ ՀԱԿ խմբակցության պատգամավոր Հրանտ Բագրատյանը չի ցանկացել մեկնաբանել Ստյոպա Սաֆարյանի այդ տեսակետը՝ ասելով. «Ստյոպա Սաֆարյանն ո՞վ ա, որ ես իրեն comment անեմ։ Քանի՞ անգամ կարելի է ասել։ Դուք ասում եք մի մարդու մասին, որին չեմ էլ ճանաչում»։

Լուրեր.com-ն այս հարցի շուրջ խոսեց Ստյոպա Սաֆարյանի հետ, ով իր խոսքում ասաց. «Հրանտ Բագրատյանին հիշեցնեմ, որ Ստեփան Սաֆարյանն այն ՀՀ քաղաքացին ու երիտասարդ քաղաքական գործիչն է, ով 2008թ. մարտի 1-ին, լսելով կոնկրետ իր՝ ոստիկանության բաժանմունք բերման ենթարկելու լուրը, իր գործընկերներ Արմեն Մարտիրոսյանի, Լարիսա Ալավերդյանի, Անահիտ Բախշյանի, Զարուհի Փոստանջյանի, Վարդան Խաչատրյանի հետ առավոտից Երևանի ոստիկանատներում փորձում էր պարզել նրա գտնվելու վայրն ու բերման ենթարկելու պատճառները: Եվ քանի որ նույն ինքը՝ այսօր արդեն պատգամավոր Բագրատյանը, չի էլ հիշում այդ ամենը, իր ողբերգությունն է (երախտամոռությունը, անաղուհաց լինելը հայաստանյան քաղաքական մշակույթի անբաժանելի մասն է): Դա իմ ողբերգությունը չէ, և նպատակ էլ չունեմ իրեն հիշեցնել, թե ով եմ ես: Բայց, եթե նա չի կարողանում բարեկրթության շրջանակներում մնալ ու առանց հեգնանքի լռության մատնել կամ շրջանցել իմ՝ որևէ վիրավորանք չպարունակող կարճ մեկնաբանությունը, ապա ես հարկադրված եմ նրան որոշ բաներ հիշեցնել, քանի որ, ի տարբերություն իրեն, լավ եմ ճանաչում ու հիշում նրան:

Ինչպես որ հեգնանքով նշում է, թե «Ստյոպա Սաֆարյանն ո՞վ ա, որ ես իրեն comment անեմ», և ինձ չի ճանաչում, նույնատիպ հեգնանքով ու ցինիզմով, «ժողովուրդն ում շունն ա» ոճով իբրև վարչապետ նա կործանեց ու ոչնչացրեց Հայաստանի տնտեսությունը, տնտեսական կարողությունները, սեփականաշնորհման անվան տակ «մեջ-մեջ» արեց ու փոշիացրեց համաժողովրդական սեփականությունը, ինչի համար էլ նրան ճանաչում և հիշում են ՀՀ քաղաքացիներն ու Ստյոպա Սաֆարյանը»,-նշեց Սաֆարյանը:

«Ժառանգության» վարչության քարտուղարի խոսքերով՝ այլ երկրներում պետությանը նման անպատկերացնելի վնաս հասցրած պաշտոնյաները համապատասխան համազգեստով վայելում են անազատության բերկրանքը, ոչ թե comment-ներ են անում:

«Ավելին, նրանց ձայնի բարձրությունն այդքան դեցիբալ ուժգնություն չի ունենում (բառաֆոնդը Հրանտինն է, երբ ՀԱԿ-ի և իշխանություն երկխոսության պիկին նա «անձամբ» Սերժ Սարգսյանին «թույլ էր տալիս» Կազանում մի քանի դեցիբալ ավել ուժգնությամբ գոռալ Ալիևի վրա, քանի որ երկխոսում էր իր հետ): Ցանկացած քաղաքական գործիչ, քայլ կատարելուց, որոշում ընդունելուց, բերանից խոսք, գոլորշի կամ քամի արտանետելուց առաջ, այո, ծանրութեթև է անում դրանից սպասվող օգուտներն ու վնասները, ինչի մասին չափազանց զուսպ ու բարեկիրթ խոսել եմ Լևոն Տեր-Պետրոսյանի լռությանը վերաբերող լրագրողի հարցի ներքո, և որը հավասարապես վերաբերում է անխտիր բոլորին: Այո, այդպիսի իրավիճակում են այն առաջնորդները, ում խոսքին սպասում են ընտրողները նախագահական ընտրություններից առաջ: Բայց խորհուրդ կտամ որևէ հոդաբաշխ միտք արտաբերելուց առաջ դրա մասին մտածի նաև Բագրատյանը: Եթե ինքը կարծում է, որ ինքը իշխանության համաներման տակ է ընկել, ապա ժողովրդի, և մասնավորապես իմ համաներման տակ չի ընկել: Ու թող չնեղվի էլ, որ այս ամենի մասին հիշողներ կան ու լինելու են»,-ասաց Սաֆարյանը: