Կիթառը, ֆլեյտան և Վահան Արծրունին

Երեկ InRock ակումբում տեղի ունեցավ երգիչ, երգահան Վահան Արծրունու և ֆլեյտահար Նելլի Մանուկյանի համատեղ համերգը։ Համերգը վերաբաշխված էր երեք սեթի, այնպես, որ հնարավորինս լիարժեք ներկայացվեր Վահան Արծրունու երգաշարը՝ գրված Ռազմիկ Դավոյանի բանաստեղծությունների հիման վրա, հնչեր Կոմիտաս. «Տասը հայտնություն» շարքը, որը գրված է Կոմիտասի բանաստեղծությունների հիման վրա, ինչպես նաև այն ստեղծագործությունները, որոնց հեղինակը հենց ինքը երգահանն է։

«Ինչ բացվել է այս ակումբը, սա արդեն թվով երրորդ կենդանի համերգն է, և երկրորդը, երբ ինձ ընկերակցում է ֆլեյտահարուհի Նելլի Մանուկյանը։ Կամաց-կամաց հղկում ենք նաև մեր մոտեցումները»,-Lurer.com-ի հետ զրույցում ասաց Վահան Արծրունին։ 

Երգահանը ողջունում է Հայաստանում ակումբային մշակույթի լայն տարածումը։ Նկատում է, որ երաժշտասեր հասարակությունն այսօր կարողանում է ըստ իր նախասիրության ընտրել ակումբը, որտեղ կատարվում է ռոք կամ ջազային երաժշտություն, հեղինակային երգ և այլ ոճեր։

Ֆլեյտահարուհի Նելլի Մանուկյանի խոսքվ՝ ինքը մեծ հաճույքով մասնակցում է Արծրունու հետ համերգային ծրագրերին. «Մեծ հնարավորություն է Վահանի երաժշտությունը ստեղծում, որ դու ինքդ քեզ կարողանաս ցույց տալ, այն ինչ որ դու կաս, և միայն դրական էմոցիաներով ենք միշտ հեռանում այստեղից և, որ ամենակարևորն է, գալիս է շատ լավ հանդիսատես և մեզ հաղորդում ջերմ էներգետիկա»,-ասաց Նելլի Մանուկյանը։

«Այս երաժշտությունը ես վայելում եմ արդեն քսան տարի։ Այս երաժշտական ֆոնի վրա մշակութային ունիկալ շերտ է, որն ինքնուրույն է և արդեն ձևավորել է իր միջավայրը։ Այն շատ մեծ չէ, բայց ընտրված մարդիկ են։ Քսան տարի, ով այդ երաժշտությունը լսում է, ինքը այդ երաժշտության մեջ է և՛ ներսից, և՛ դրսից։ Այս արվեստը տալիս է մեծ հնարավորություն՝ մտորելու կյանքի լուրջ երևույթների մասին։ Այն օգնում է մարդկանց զարգանալ, ինքնակրթվել և ձևավորվել որպես հայ»,-ասաց հանդիսատեսից մեկը։

Նելլի Ավետիսյան