«Օբաման», «Ռոմնին», «Սենդին»՝ այս տարվա ամենանորաձև անուններ

Ոմանք կանխատեսում են, որ ԱՄՆ-ում նորաձև է դառնում «Սենդի» անունը։ Այդ անունը կկրեն նույնանուն փոթորկի ժամանակ կամ դրանից ինչ-որ ժամանակ անց ծնված երեխաները։ Այդպես է դա, թե՝ ոչ, սակայն «Բարաք Օբամա» և «Միթ Ռոմնի» անուններն արդեն ծաղկում են ապրում։ Ընդ որում, ոչ միայն ԱՄՆ-ում։

Քենիայի 20-ամյա քաղաքացի Միլիսենտ Օվուորն իր նորածին երկվորյակներին անվանել է Բարաք Օբամա և Միթ Ռոմնի։ Փոքրիկները լույս աշխարհ են եկել նոյեմբերի առաջին օրերին երկրի հարավ-արևմուտքում գտնվող Սիայա քաղաքի հիվանդանոցներից մեկում։ Ինչպես ասել է երիտասարդ մայրը, որդիներն իրեն միշտ կհիշեցնեն ԱՄՆ-ի վերջին նախագահական ընտրությունների մասին։ Հիվանդանոցը, որի բժիշկներն ընդունել են տիկին Օվուարի երեխաների ծնունդը, գտնվում է Կոգելու գյուղի մոտակայքում՝ ներկայիս ԱՄՆ-ի նախագահ Բարաք Օբամայի հոր ծննդավայրում։ Օբամայի 90-ամյա տատիկը մինչև հիմա ապրում է այդտեղ։

Քենիայում Բարաք Օբամային մեծ համակրանքով են վերաբերում։ Երբ հայտնի դարձավ, որ դեմոկրատը կվերընտրվի, Կոգելոյի բնակիչները դուրս են վազել փողոց՝ վանկարկելով «Կեցցե՜ Կոգելոյի որդին», «Ճանապարհ Օբամային»։ Տեղի պաշտնյաները վստահ են, որ 45-ամյա նախագահի պարտության դեպքում Քենիայում ԱՄՆ-ի կողմից ֆինանսավորվող մի շարք նախագծեր կփակվեին։ Ինքը՝ Օբաման վերջին 4 տարիների ընթացքում այցելել է Աֆրիկայի այն հատվածը, որտեղ գտնվում է Քենիան՝ միայն մեկ անգամ անցկացնելով այնտեղ 1 օրից քիչ ժամանակ։