Տնտեսվարողները վախեցա՞ծ են կառավարությունից

Երեկ կառավարության նիստի ժամանակ սննդի անվտանգության պետական վարչության պետ Աբրամ Բախչագուլյանը ներկայացրեց պանրի ոլորտում արված ուսումնասիրությունները:

Ստուգումները կատարվել են թվով 59 տնտեսվարող սուբյեկտների մոտ։ Ստուգումների արդյունքում թվով 18 տնտեսվարող սուբյեկտի գործունեությունն արգելվել է՝ առանձին արտադրության կամ ամբողջ արտադրության կտրվածքով:

Սննդի անվտանգության պետական ծառայությունը հրապարակել է վերոնշյալ 18 տնտեսավարողների ցանկը:

Լուրեր.com-ին հաջողվեց զրուցել «ԻԳԻԹ» ԿԱԹՆԱՄԹԵՐՔԻ ԳՈՐԾԱՐԱՆ ՍՊԸ-ի տնօրեն Անդրանիկ Իգիթյանի և «ԿԱԹՆԱՄԹԵՐՔ ՎԱՆ» ՍՊԸ-ի տնօրենի հետ, ում անունը չհաջողվեց ճշտել։

Վերջինս շատ արագ փորձեց համոզել, որ իրենց ընկերությունում ոչինչ չի հայտնաբերվել։ «Փոքր շեղումներ կան, հանձնարարականներ տվել եմ, կկատարենք»։ Լրագրողի այն դիտարկմանը, որ սննդի անվտանգության ծառայության հրապարակած ցանկում կա նաև իրենց ընկերության անվանումը, «ԿԱԹՆԱՄԹԵՐՔ ՎԱՆ»-ի տնօրենն ասաց, որ դա թյուրիմացություն է։ Ընկերության տնօրենը նշեց նաև, որ իրենց նկատմամբ տուգանք չի կիրառվել և տրվել է հանձնարարական, ու արագ անջատեց հեռախոսը։

Ի տարբերություն վերոնշյալ ընկերության՝ «ԻԳԻԹ» կաթնամթերքի գործարան ՍՊԸ-ի տնօրեն Անդրանիկ Իգիթյանի խոսքերով՝ իրենց նկատմամբ կիրառվել է 200 000 դրամ տուգանք։ 

Իգիթյանի համոզմամբ՝ ցուպիկն առկա է բոլոր տեղերում և այն, հնարավոր է, անցնի նաև ձեռքի միջոցով, և այդ միկրոբն անվտանգ չէ։ Տնօրենը չի բացառում նաև, որ ուսումնասիրությունների ժամանակ արված անալիզների պատասխաններն են սխալ եկել։ «Ես սխալ չեմ համարում կառավարության որոշումը, ես չգիտեմ, կարող է օրենքով աղիքային ցուպիկն այդ մթերքի մեջ թույլատրվում է իքս քանակությամբ, հիմա այդ անալիզը կարող է սխալ են գրել, օրինակ 100-ի փոխարեն եղել է 110 հատ, դա էլ նշանակում է, որ աղիքային ցուպիկների քանակը շատ է այդ մթերքի մեջ»,-նշեց տնօրենը։

Նշված ընկերությունում դադարեցված է միայն Գյումրի տեսակի պանրի արտադրությունը։

Լրագրողի այն դիտարկմանը, որ, եթե ուսումնասիրությունների արդյունքում պարզ դառնա, որ իրենց գործունեությունը կատարվել է ճիշտ և ցուպիկի քանակը նորմայի չափ է եղել, կպահանջե՞ք, որ չվճարեք այդ 200 000 տուգանքը, Անդրանիկ Իգիթյանն ասաց. «Բայց ես ինչպե՞ս կարող եմ, անալիզն արել են, դա է ցույց տվել, ես ի՞նչ կարող եմ անել։ Դա հնարավոր բան է, և բացառելն անհնար է։ Դա հազար պրոցեսների հետ է կապված»։

Ըստ սննդի անվտանգության ծառայության հրապարակած տվյալների՝ աղիքային ցուպիկի մանրեներ մեծ մասամբ եղել են Չանախ պանրի արտադրատեսակում: Սակայն վերոնշված ընկերությունում դադարեցված է Գյումրի պանրի տեսակի արտադրությունը։ Այս ընկերությունը դեռևս պետք է սպասի սննդի անվտանգության ծառայությունից համապատասխան գրություն, որպեսզի վերականգնի պանրի տեսակի արտադրությունը։

Նշենք, որ սննդի անվտանգության ծառայության ուսումնասիրությունների արդյունքում պարզ է դարձել, որ պանիր արտադրող խոշոր ընկերություններն ավելի պարտաճանաչ են, և մարսողական համակարգի հետ կապված խնդիրներ իրենց կողմից արտադրված արտադրանքում չեն առաջացնում, քանի որ ներդրել են անվտանգության համակարգերը և կարողանում են ապահովել սանիտարահիգիենիկ պահանջների նկատմամբ հսկողությունը:

Հարկ է նշել նաև, որ հեռախոսազրույցից զգալի էր տնտեսվարող սուբյեկտների շփոթվածությունը և ինչ-որ տեղ նաև վախը։ Դա փաստեց նաև այն, որ նույնիսկ «անմեղությունն» ապացուցելու դեպքում տնտեսվարողները պատրաստ են տուգանք վճարել։ 

Ազատուհի Արասխանյան