Արման Սաղաթելյան. Հալեպ փոխադրված հումանիտար բեռն այսօր կտեղափոխվի կենտրոնական շտաբ

Ակնկալվում է, որ Երևանից Հալեպ փոխադրված հումանիտար բեռը, որը Երևանի ժամանակով ժամը 14:00-ին արդեն Հալեպի օդանավակայանում էր, այսօր կտեղափոխվի կենտրոնական շտաբ՝ հետագա վերաբաշխման համար: Այս մասին ԱրմՌադիո FM 107-ի եթերում հաղորդել է PanARMENIAN Media Group գլխավոր տնօրենի տեղակալ Արման Սաղաթելյանը, ով այժմ գտնվում է Հալեպում:

Նա մանրամասնել է, որ բեռն ամբողջությամբ կշռում է 12,5 տոննա, բաղկացած է 1342 արկղից, հիմնականում սննդամթերքով:

«Թերևս, օգնությունը բաշխվելու է «մեկ արկղ' մեկ ընտանիքին» սկզբունքով, և այն իհարկե նախատեսված է ոչ միայն հայկական համայնքի համար,- նշել է Արման Սաղաթելյանը, հավելելով, որ Հալեպում հայկական հյուպատոսարանը միակն է, որ ակտիվոր աշխատում է, բազմաթիվ մարդիկ են դիմում տարբեր հարցերով: Այլ դիվանագիտական ներկայացուցչությունները չեն աշխատում:

Ինչ վերաբերում է Հալեպում տիրող իրավիճակին, ապա Արման Սաղաթելյանի փոխանցմամբ, երեկոյան ժամերին փոխհրաձգության ձայներ են լսվում, ոչ այդքան ակտիվ, սակայն, այնուամենայնիվ, կրակոցներ կան: Երեկ գրոհային ինքնաթիռ է նկատվել օդում, և քաղաքի տարբեր վայրերում պայթյուններ արձանագրվեցին' ավիացիայի գործածման հետևանքով:

Սակայն, այնուամենայնիվ, ընդհանուր առմամբ, մարդիկ չեն վախենում փողոց դուրս գալ, սրճարաններն ու ռեստորանները կենտրոնում աշխատում են, բաց են խանութները, շուկան: Իհարկե, մարդիկ զգուշավոր են, սակայն, քաղաքն ապրում է բավականին աշխույժ կյանքով,- Հալեպից հաղորդել է PanARMENIAN Media Group գլխավոր տնօրենի տեղակալ Արման Սաղաթելյանը:

Times.am