Հանդիպում «Սալվադոր ֆեստ» մտքի փառատոնի կազմակերպիչների և հաղթող ճանաչվածների հետ

Այսօր` նոյոմբերի 9-ին, ՀՀ էկոնոմիկայի նախարար Տիգրան Դավթյանն ընդունել է հոկտեմբերին Հայաստանում առաջին անգամ կազմակերպված «Սալվադոր ֆեստ» մտքի փառատոնի կազմակերպիչներին և ստեղծարար, օրիգինալ նորարարական մտքեր ունեցող ու հաղթող ճանաչված ուսանողներին:

Ողջունելով հանդիպման մասնակիցներին և շնորհավորելով հաղթողներին` Տիգրան Դավթյանը կարևորել է մտքի փառատոնի կազմակերպման գաղափարը և նշել, որ այն լավ հնարավորություն է բացահայտելու տաղանդավոր երիտասարդներին և հանրայնացնելու նրանց հետաքրքիր նախաձեռնությունները:

«Ներկայացրեք մեզ ձեր գաղափարները, իսկ մենք կփորձենք հասցնել դրանք պրագմատիկ դաշտ և կիրառել մեր երկրի տնտեսական զարգացման համար»,-հորդորել է երիտասարդներին էկոնոմիկայի նախարարը` հույս հայտնելով, որ մոտ ապագայում նրանց գիտելիքները կծառայեցվեն ի նպաստ Հայաստանի հզորացմանը:

Հանդիպման ընթացքում նախարարը համառոտ ծանոթացրել է ներկաներին նախարարության կառուցվածքին, գործունեությանը, ներկայացրել նախարարության իրավասության ոլորտների և խնդիրների լայն շրջանակը:

Անկաշկանդ մթնոլորտում ուսանողները ներկայացրել են նախարարին իրենց գաղափարները և ուշադրությամբ ու մեծ հետաքրքրությամբ լսել նրա մեկնաբանությունները և դիտողությունները:

«Սալվադոր ֆեստ» մտքի փառատոնի կազմակերպիչները, շնորհակալություն հայտնելով էկոնոմիկայի նախարարին իրենց ընդունելու համար, կարևորել են նախարարության կարծիքը իրենց նախաձեռնության մասին: Նրանք նաև նշել են, որ ակնկալում են հետագայում ակտիվ համագործակցել նախարարության հետ: Մասնավորապես, որպեսզի իրենց միջոցառումը, որը շարունակական է լինելու, չկրի սոսկ տեսական բնույթ, նրանք խնդրել են նախարարին ուղղորդել իրենց, աջակցել ուսումնասիրման ենթակա արդիական թեմաների ընտրության հարցում, ինչպես նաև առաջարկել են խրախուսել հաղթողներին:

Հանդիպման ավարտին էկոնոմիկայի նախարարը խորհուրդ է տվել ապագա տնտեսագետներին հաջողության հասնելու համար հաշվարկել իրենց գաղափարների տնտեսական արդյունավետությունը և փորձել վերածել դրանք բիզնես-ծրագրերի: