Հայկական համույթի ձայնասկավառակը՝ «Edison Award» մրցանակաբաշխության հաղթող

Գ. Ի. Գուրջիևի անվան ժողովրդական նվագարանների համույթի ձայնասկավառակն այս տարվա հոկտեմբերին ներկայացվել է հոլանդական հեղինակավոր «Edison Award» մրցանակաբաշխությանը և «Լավագույն ժողովրդական ալբոմ» անվանակարգում արժանացել՝ հաղթողի կոչմանը:

Հաղթանակած ձայնասկավառակը, որ ներկայացնում է հայազգի փիլիսոփա, երաժիշտ, պարուսույց, գրող Գ. Ի. Գյուրջիևի երաժշտության ժողովրդական գործիքների համար արված մշակումներ, թողարկվել է 2011 թվականի հուլիսին՝ գերմանական հեղինակավոր «ECM Records» ընկերության կողմից:

Ձայնասկավառակում Գուրջիևի մեղեդիները հնչում են Գուրջիևի անվան ժողովրդական նվագարանների համույթի կատարմամբ, որը հիմնադրվել է 2008 թ. Լևոն Էսկենյանին կողմից: Համույթում ընդգրկված են Հայաստանի լավագույն երիտասարդ կատարողները։ Անցած տարի համույթը բազմաթիվ ելույթներով հանդես է եկել Ռուսաստանի, Շվեցարիայի, Իտալիայի, Գերմանիայի, Բելգիայի, Լեհաստանի հեղինակավոր բեմերում, մասնակցել՝ տարբեր փառատոների:

«Edison Award» մրցանակաբաշխությունն այս տարի տեղի է ունենալու նոյեմբերի 28-ին, հոլանդիայի Էյնդհովեն քաղաքի Ֆիլիպս համերգասրահում, որտեղ էլ մրցանակը կհանձնվի Գուրջիևի անվան ժողովրդական նվագարանների համույթի հիմնադիր և գեղարվեստական ղեկավար Լևոն Էսկենյանին:

«Edison Award» մրցանակը ձայնասկավառակի միակ հաջողությունը չէ, քանզի թողարկման օրվանից այն բազմիցս արժանացել է տարբեր մրցանակների, երաժշտական աշխարհի ջերմ ընդունելությանը, ինչպես նաև համաշխարհային մամուլի ամենաբարձր գնահատանքին: 2012 թվականին Հայաստանի «Ազգային երաժշտական մրցանակաբաշխությանը» ալբոմը ճանաչվել է որպես տարվա լավագույն ժողովրդական ալբոմ, որին անդրադարձել են այնպիսի լրատվամիջոցներ, ինչպիսիք են «BBC Music Magazine»-ը, «The Guardian»-ը, «The Financial Times»-ը, «The Independent»-ը, «USA National Public Radio»-ն, «NPR Music»-ը, «Mitteldeutsche Zeitung»-ը, «L’Unita»-ն, «LA LIBERTÉ»-ն, «The Wire»-ը: Ավելին, Ավստրալիայի պետական ռադիոն՝ «ABC»–ն, 2011 թվականի սեպտեմբերին ձայնասկավառակը ճանաչել է շաբաթվա լավագույն ալբոմ, իսկ 2012 թ. հունվարին ամերիկյան «Q2» դասական երաժշտության ռադիոընկերությունն այն անվանել է շաբաթվա լավագույն CD-ալբոմ:

«Edison Award»-ը հանդիսանում է աշխարհի 4 ամենահեղինակավոր մրցանակաբաշխություններից մեկը և իր հեղինակությամբ ու կարևորությամբ համեմատվում է ամերիկյան «Grammy Award», գերմանական «Preis der Schallplayyenkritik» և ֆրանսական «Victoire» երաժշտական մրցանակաբաշխությունների հետ: Այս մասին է վկայում թերևս այն փաստը, որ 1960 թվականին ստեղծված այդ մրցանակաբաշխության պատվո կոչումներին արժանացել են այնպիսի հեղինակավոր ստեղծագործողներ, ինչպիսիք են համաշխարհային երաժշտարվեստի պսակ հանդիսացող արվեստագետներ Շառլ Ազնավուրը, Մայլս Դեյվիսը, Էմիլոու Հարրիսը, Էրիկ Քլեփտոնը, Բոբ Ջեյմսը, Ֆիլ Քոլինսը, Ռայ Քուդերը, Սթիվի Ուանդերը, Ռոբի Ուլիամսը, Վալերի Գերգիևը, Եվգենի Կիսինը, Կլաուդիո Արաուն, Պիեռ Բուլեզը և այլոք: Մրցանակաբաշխությունն առաջնորդվում է ամենաբարձր չափանիշներով՝ մրցանակներ շնորհելով միայն «բացառիկ արժեք ներկայացնող ձայնասկավառակների»:

Ս. թ. նոյեմբերի 9-ին, ժամը 12:00-ին ՀՀ մշակույթի նախարարությունում, թեմային նվիրված մամուլի ասուլիսին մասնակցում էին ՀՀ մշակույթի նախարարության աշխատակազմի ժամանակակից արվեստի վարչության պետ Սեյրանուհի Գեղամյանը, նույն վարչության գլխավոր մասնագետ Արմինե Ղազարյանը, Գուրջիևի անվան ժողովրդական նվագարանների համույթի հիմնադիր և գեղարվեստական ղեկավար Լևոն Էսկենյանը: