Սփյուռքի նախարարն ընդունեց Ղազախստանի ազգությունների ասամբլեայի պատվիրակությանը

Նոյեմբերի 9-ին Հայաստանի Հանրապետության սփյուռքի նախարար Հրանուշ Հակոբյանն ընդունեց Ղազախստանի ազգությունների ասամբլեայի պավիրակությակությանը՝ ասամբլեայի քարտուղարության ղեկավար Երալի Տոգժանովի գլխավորությամբ: Հանդիպմանը մասնակցում էին Ղազախստանի ազգությունների ասամբլեայի նախագահի տեղակալ Արտուշ Կարապետյանը և Կարագանդայի մարզի հայկական մշակութային կենտրոնի նախագահ Արթուր Նավասարդյանը: Հանդիպմանը ներկա էր նաև Հայաստանում Ղազախստանի հանրապետության արտակարգ և լիազոր դեսպան Ն. Գ. պարոն Այիմդոս Բոզժիգիտովը:

Հյուրերը ներկայացրին Ղազախստանում ազգային փոքրամասնությունների խնդիրների լուծմանն ուղղված պետական քաղաքականության սկզբունքները և Ղազախստանի ազգությունների ասամբլեայի գործունեությունը:

Քննարկվեցին Ղազախստանի հայ համայնքների խնդիրները՝ մասնավորապես անդրադառնալով Ղազախստանի ընդհանուր հանրակրթական և կիրակնօրյա դպրոցներում մայրենի լեզվի դասավանդման խնդիրներին:

ՀՀ սփյուռքի նախարար Հրանուշ Հակոբյանը ներկայացրեց սփյուռքի նախարարության ծրագրերը և առաջարկեց համագործակցել նշված ծրագրերի շրջանակում:

Հանդիպման ընթացքում փոխհամաձայնություն ձեռք բերվեց, ըստ որի Ղազախստանի ազգությունների ասամբլեան կաջակցի Ղազախստանի հայ համայնքի՝ նախարարության ծրագրերին առավել ակտիվ մասնակցություն ունենալու հարցում: