Սիրիական տանկերը Գոլանի բարձունքներ են մտել ՄԱԿ-ի համաձայնությա՞մբ

Դամասկոսը պնդում է, որ նոյեմբերի 3-ին Գոլանի բարձունքների ապառազմականացված գոտի տանկեր է մտցրել այդ շրջանում տեղակայված ՄԱԿ-ի ուժերի համաձայնությամբ: Ինչպես նշվում է ուրբաթ օրը սիրիական պատվիրակության կողմից ՄԱԿ-ի գլխավոր քարտուղար Բան Կի Մունին ուղղված նամակում, զինվորականները դիմել են այդ քայլին՝ սահմանամերձ գյուղերը ահաբեկիչներից մաքրելու համար:

«ՄԱԿ-ի դիտորդական ուժերի հրամանատարությունը պատշաճ կերպով տեղեկացված է եղել իրավիճակի մասին: Նրանցից թույլտվություն է ստացվել՝ Բրեյգա և Բիր Աջեմ գյուղեր փոքր մարտական խմբեր մտցնելու հնարավորության համար»,-նշված է ՄԱԿ-ում Սիրիայի Արաբական Հանրապետության հատուկ ներկայացուցիչ Բաշար Ջաֆարիի հղած նոտայում: Նամակի բովանդակությունից հետևում է, որ թույլտվություն խնդրելուց հետո մի քանի ժամվա ընթացքում խաղաղապահների կողմից բանավոր համաձայնություն է ստացվել «երկու գյուղերը ահաբեկիչներից ազատագրելու նպատակով սահմանային ռազմական գործողություններ իրականացնելու համար»:

Հիշեցնենք, որ իսրայելական բանակի դիրքերից մի քանի կմ հեռավորության վրա գտնվող բուֆերային գոտու գյուղերում սիրիական տանկերի հայտնվելը հրեական պետության կողմից գնահատվել էր որպես 1974թ. Սիրիայի և Իսրայելի միջև կնքած պայմանավորվածության խախտում: