Ահարոնյանը` ակնարկելով Ծառուկյանին. Նստած-հելած տղերքը բավական հաջող նախագահ են դառնում

Երեկ «Սոցիոմետր» սոցիոլոգիական կենտրոնի ղեկավար Ահարոն Ադիբեկյանը լրագրողների հետ հանդիպման ժամանակ խոսեց գալիք նախագահական ընտրություններից՝ գնահատելով հավանական թեկնածուների հնարավորությունները։

Ըստ սոցիոլոգի՝  գործող նախագահ Սերժ Սարգսյանը և ԲՀԿ նախագահ Գագիկ Ծառուկյանը առաջատարներն են: ՀԱԿ առաջնորդ Լևոն Տեր-Պետրոսյանը, «Ժառանգություն» կուսակցության ղեկավար Րաֆֆի Հովհաննիսյանը և ՀՀ երկրորդ նախագահ Ռոբերտ Քոչարյանն այս պահին իրար հավասար տեղում են: Այնուհետև գալիս են դաշնակցական թեկնածուներ՝ Վահան Հովհաննիսյանը, Արմեն Ռուստամյանը:

Ասուլիսի ժամանակ Ադիբեկյանը չհապաղեց և անդրադարձավ նաև ԱՄՆ ընտրություններին՝ զուգահեռներ անցկացնելով, մասնավորապես նշեց, որ ԱՄՆ նախագահի թեկնածու Բարաք Օբաման Կոլումբիայի Դաշնային շրջանում 92% ձայն է հավաքել: «Այն հետևանք է նրա, որ Վաշինգտոնը Կոլումբիայի կենտրոնն է, Վաշինգտոնի բնակիչների երկու երրորդը սևամորթներ են, ուստի սևամորթները քվեարկել են Բարաք Օբամայի օգտին», - բացատրեց Ահարոնը Ադիբեկյանը։ Ըստ սոցիոլոգի՝ հաղթանակը ԱՄՆ նախագահական ընտրություններում կապ չի ունեցել գաղափարի և վարչական ռեսուրսի հետ, սևամորթների մեծ մասը պարզապես իր ձայնը տվել է Օբամային:

Այնուհետև հավելեց, որ Օբաման հիմնականում ստացել է կանանց և երիտասարդների ձայնը, որոնք գաղափարապես այնքան էլ հասուն չեն, իսկ պահպանողականները՝ մեծահասակները, ձայնը տվել են Ռոմնիին: Երբ համեմատում ենք բավականին դիպուկ է Հայաստանի հետ: Հայաստանում Օբամայի տեղը զբաղեցնում է Գագիկ Ծառուկյանը, ով խոսում է հասարակ ժողովրդի կարիքներից, երբևէ լսել եք, որ Գագիկ Ծառուկյանն արտաքին քաղաքականությունից խոսի, այսօրվա հայաստանյան քաղաքական դատում ԲՀԿ-ն շարունակում է զբաղեցնել ջոկերի տեղը և իր շուրջ ինտրիգ պահպանել՝ ԲՀԿ-ն կարող է և վերադառնալ իշխանական կոալիցիա, և սեփական թեկնածու առաջադրել, և սատարել այլ կուսակցության թեկնածուի:

Ինչպես նաև, Ադիբեկյանը չբացառեց քաղաքական առևտրի տարբերակը, որը տեղի կունենա Հովիկ Աբրահամյանի միջոցով, քանի որ Աբրահամյանը կապեր ունի  թե՛ Սերժ Սարգսյանի թե՛ Գագիկ Ծառուկյանի հետ։ Հանգստացնելու համար՝ Ահարոն Ադիբեկյանը նշեց, որ նման առևտուրն ընդունված է ամբողջ աշխարհում։ Վերջում էլ ակնարկելով Գագիկ Ծառուկյանին նշեց, որ «Նստած-հելած տղերքը բավական հաջող նախագահ են դառնում»։