Արմեն Արզումանյան. ՀՀ Նախագահը լիովին առողջ է

ՀՀ Նախագահի «առողջական խնդիրների» մասին պարբերաբար շրջանառության մեջ դրվող լուրերն ապատեղեկատվություն են: Այս մասին Panorama.am-ին հայտնել է ՀՀ նախագահի մամուլի խոսնակ Արմեն Արզումանյանը, պատասախանելով հարցին, թե իրականությանը համապատասխանում են արդյոք որոշ կայքերի տարածած լուրերը, ըստ որոնց իբր ՀՀ Նախագահ Սերժ Սարգսյանն առողջության հետ կապված խնդիրներ ունի:

«ՀՀ նախագահ Սերժ Սարգսյանը առողջական որևէ խնդիր չունի: ՀՀ Նախագահը լիովին առողջ է: Ավելին, արձակուրդի ընթացքում անգամ պրոֆիլակտիկ բուժզննում նախատեսված չէ»,-ասաց Ա. Արզումանյանը:

Հիշեցնենք, որ ՀՀ նախագահ Սերժ Սարգսյանը նոյեմբերի 11-ին եռօրյա պաշտոնական այցով կմեկնի Ֆրանսիայի Հանրապետություն: Ավարտելով պաշտոնական այցը Ֆրանսիայի Հանրապետություն՝ նախագահ Սերժ Սարգսյանը կմեկնի մեկշաբաթյա արձակուրդ, որը կանցկացնի արտերկրում:

Ըստ երկրի ղեկավարի մամուլի գրասենյակի տարածած հաղորդագրության՝ Սերժ Սարգսյանը Փարիզում հանդիպումներ կունենա Ֆրանսիայի նախագահ Ֆրանսուա Օլանդի, վարչապետ Ժան-Մարկ Էրոյի, Ազգային ժողովի նախագահ Կլոդ Բարտոլոնի, Սենատի նախագահ Ժան-Պիեռ Բելի հետ: Նախատեսվում են նաև հանդիպումներ Ֆրանսիայի Ազգային ժողովի և Սենատի Ֆրանսիա-Հայաստան բարեկամության պատգամավորական խմբերի անդամների հետ:

Պաշտոնական այցի շրջանակներում նախագահը կայցելի նաև Լիոն, որտեղ հանդիպում կունենա քաղաքապետ, սենատոր Ժերար Կոլոմբի հետ, այնուհետև Ֆրանսիայի խոշորագույն արդյունաբերական շրջաններից մեկի՝ Ռոն-Ալպ շրջանի առևտրաարդյունաբերական պալատում կհանդիպի Ֆրանսիայի գործարար համայնքի ներկայացուցիչների հետ: