Ինչ պայմանով ՀՀԿ-ն կբանակցի ԲՀԿ-ի հետ

ԱԺ «Բարգավաճ Հայաստան» խմբակցության քարտուղար Նաիրա Զոհրաբյանը հանդես էր եկել հայտարարությամբ և ներկայացրել իր կուսակցության մոտեցումներն առաջիկա նախագահական ընտրությունների և երկրի կառավարման համակարգի վերաբերյալ։

Հայտարարությունում շեշտվում է կառավարման խորհրդարանական համակարգին անցում կատարելու անհրաժեշտությունը, և այդ կապակցությամբ ԱԺ-ում 100% համամասնական ընտրակարգին անցնելը։ Ըստ այդմ, ԲՀԿ-ն կսկսի խորհրդակցությունները քաղաքական ուժերի հետ։

Այս թեմայի շուրջ Lurer.com-ը զրուցեց ԱԺ ՀՀԿ խմբակցության ղեկավար Գալուստ Սահակյանի հետ, ով իր խոսքում նշեց.

«ՀՀԿ-ն նման հարցադրումներին շատ վաղուց պատասխանել է, որովհետև տարիներ շարունակ նույն հարցադրումներով հանդես են եկել և՛  ԱԺՄ-ն, և´ ՀՅԴ-ն, և´ «Ժառանգությունը»։  Այդ հարցերին մենք արդեն բոլոր արգումենտներով պատասխանել ենք, եթե նոր հիմնավորումներ լինեն, կմտածենք։ Առաջարկներ կարող են լինել և՛ ՀՅԴ-ից, և՛ ԲՀԿ-ից, և՛ «Ժառանգությունից», և՛ ՀԱԿ-ից այդպիսի խնդիրներ չենք քննարկում։ Նախևառաջ, այդ միտումներով քաղաքական ուժերը պիտի  հանրագումարի գան և նոր հիմնավորումներ բերեն, որը շատ կասկածում եմ, որ նաև մենք մասնակցություն ունենանք»։

Գալուստ Սահակյանը հավելեց նաև, որ ՀՀԿ-ն գնում է «լավ ընտրություններ, լավ արդյունքներ» քաղաքական սկզբունքով։ Ըստ նրա՝ որևէ  կուսակցության կողմից հիմնավորված հայտարարություններ չկան, ընդամենը դրույթներ են, դրա համար հարկավոր են լուրջ հիմնավորումներ։ «ՀՀԿ-ն բազմիցս ասել է, որ մոդելի փոփոխությունները կապ չունեն այն խնդիրների հետ, որոնք պետության առջև ծառացած են, որովհետև ժողովրդական մոդելները տարբեր են ամբողջ աշխարհում։ Կարևորը ոչ թե մոդելներն են՝ այլ այն բարեփոխումները, որոնք կկարողանա իրակացնել պետությունը»,-նշեց վերջինս։ 

«Մենք լուրջ կուսակցություն ենք, ամեն ինչ չէ, որ մենք պարտադրված պետք է լինենք քննարկել։ Հարգում ենք բոլորի հայտարարությունները, բայց այսօր մեր քաղաքական սկզբունքները, կարողությունը, առաջիկա ծրագրերը բոլորովին չեն համընկնում այն խնդիրների հետ, որոնք տարիներ շարունակ քննարկել ենք և հիմնավոր պատասխաններ ենք տվել»,-ասաց ԱԺ ՀՀԿ խմբակցության ղեկավարը։ 

Գալուստ Սահակյանը նշեց նաև, որ ԲՀԿ-ից դեռ առաջարկ չեն ստացել։

Նելլի Ավետիսյան