McDonald's-ը կորցնում է իր հաճախորդներին

Այս տարվա հոկտեմբերի տվյալներով՝ McDonald's արագ սննդի կետերի ցանցը հայտնել է վաճառքների 2% նվազման մասին:

Եվրոպայում վաճառքների ծավալները նվազել են 2.2%-ով, իսկ Ասիայում, Աֆրիկայում և Մերձավոր Արևելքում` 2.4%-ով: Ընկերության ղեկավարության համար հիմնական մտավախությունը կապված է ամերիկյան շուկայի հետ, որն ընկերության համար հիմնական շուկան է: Նախորդ ամսում ամերիկյան շուկայում վաճառքի ծավալները նվազել են 2.2%-ով: Դա ընկերության կանխատեսումները գերազանցում է երկու անգամ: Ընկերության հասույթի մեկ երրորդը պատկանում է ԱՄՆ շուկային:

Դոնալդ Թոմփսոնը, որն այս տարի դարձել է ընկերության տնօրենը, հայտնել է, որ հասույթի նվազումը պայմանավորված է տնտեսական անկայուն իրավիճակով և մրցակցության սրացումով: Ընկերության ֆինանսական վատթարացումը կապվում է նաև «Սենդի» փոթորկի հասցրած վնասների հետ:

Սակայն McDonald's-ի մրցակիցները, չնայած «Սենդի» փոթորկի հասցրած վնասներին և տնտեսական անկայուն վիճակին, կարողացել են լավացնել իրենց ֆինանսական ցուցանիշները: Burger King, Wendy's և Taco Bell արագ սննդի ցանցերը հասել են ֆինանսական վիճակի լավացման՝ իրականացնելով ագրեսիվ մարքեթինգային քաղաքականություններ և փոփոխելով մատուցված ուտեստների ցանկը:

Այս տարվա հոկտեմբերի վերջի տվյալներով՝ արագ սննդի ցանցերի մեջ ամենամեծ հասույթն ունեցել է Wendy's-ը: Ընկերության վաճառքի ծավալներն ավելացել են 2.7%-ով: