Սիրիայի ընդդիմության քրիստոնյա ղեկավարն օգնություն է ակնկալում Արևմուտքից

Associated Press գործակալության հաղորդմամբ` Սիրիայի ընդդիմության ամենախոշոր կազմակերպության` Սիրիայի ազգային խորհրդի նորընտիր ղեկավար Ժորժ Սաբրան, ով քրիստոնյա է, հայտարարել է, թե հիասթափված է այն հանգամանքից, որ արևմտյան տերությունները պատշաճ մակարդակի աջակցություն չեն տրամադրում ընդդիմությանը, մինչդեռ նախագահ Բաշար ալ Ասադի վարչակարգը դաշնակից երկրներից մեծ ծավալի օգնություն է ստանում։

Սաբրան Քաթարի մայրաքաղաք Դոխայում գումարված ժողովում է ընտրվել Սիրիայի ազգային խորհրդի ղեկավար։ ԱՄՆ-ն, արևմտյան ու արաբական այլ պետություններ կոչ են անում Սիրիայի ընդդիմությանը ստեղծել խոշոր կազմակերպություն, որը կստանա միջազգային համայնքի ճանաչումը, համակարգված կգործի երկրի ներսում պայքարը շարունակող ապստամբների և ակտիվիստների հետ և այդ ճանապարհով կնախապատրաստի իշխանափոխության համար անհրաժեշտ պայմաններ։

Հիշեցնենք, որ Սիրիայի ընդդիմադիր Ազգային խորհուրդը նոյեմբերի 9-ին Ժորժ Սաբրային ընտրել է որպես կազմակերպության նոր ղեկավար: Քաթարի մայրաքաղաք Դոխայում նոյեմբերի 4-ից մեկնարկած քննարկումների նպատակն է եղել ընդդիմության միացյալ մարմնի ստեղծումն ու Բաշար ալ Ասադի դեմ մղվող պատերազմի ընդհանուր ռազմավարության որդեգրումը: Մասնակից 41 պատվիրակներից Սաբրան ստացել է 28-ի աջակցությունը և Ազգային խորհրդի ղեկավարի պաշտոնում փոխարինել Աբդելբասեթ Սիդային, ով ներկայացնում էր Սիրիայի քրդական համայնքը: Տեղեկատվության համաձայն` Սաբրան նախկինում եղել է կոմունիստ, այժմ սոցիալ-դեմոկրատական հայացքներ է դավանում: Աշխատել է դպրոցում որպես ուսուցիչ, ծնվել և մեծացել է քրիստոնեական ընտանիքում և ինքն էլ հավատացյալ քրիստոնյա է: