«Samsung»-ի հին սմարթֆոնները կունենան ԱԻ գործառույթներ

«Samsung»-ը հին սմարթֆոններին կավելացնի արհեստական ​​ինտելեկտի (ԱԻ) գործառույթներ։ Այս մասին հայտնում է Android Authority-ն։

Հունվարի 17-ին ընկերությունը ներկայացրել է Galaxy S24 շարքի նոր ֆլագմանները, որոնք, ի թիվս այլ բաների, ստացել են նաև Galaxy AI-ի հիման վրա օգնական։ Ավելի ուշ Samsung-ը հայտնել է, որ վիրտուալ օգնականը հասանելի կլինի նաև ապրանքանիշի հին սարքերում: Հայտնի է, որ Galaxy AI-ն կավելացվի Galaxy S23, Galaxy S23 FE, Galaxy Z Fold 5 և Flip 5 սմարթֆոններին, ինչպես նաև Galaxy Tab S9 պլանշետներին։

Լրագրողները պարզել են, որ 2023 թվականին թողարկված սարքերը չեն ունենա վիրտուալ օգնականի բոլոր հնարավորությունները։ Ավելի հին սարքերում կավելացվեն «Circle» որոնման գործառույթը, ինչպես նաև հեռախոսազանգերի ժամանակ կենդանի թարգմանության հնարավորությունը:

Հրապարակման հեղինակները նշել են, որ ԱԻ որոշ գործառույթներ կլինեն միայն Samsung-ի նոր ֆլագմաններում։ Դրանք ներառում են հաղորդագրությունների պատասխանները գրելու և խմբագրելու ծառայությունը, ձայնագրությունների տեքստի վերծանումը, «խելացի» պաստառը և այլ գործառույթներ: