Եթե հարկ վճարող մարդկանց հերոս չհամարենք՝ հերոս զինվոր կունենանք ավելի շատ զոհվածի կարգավիճակում․ Փաշինյան

Բլոգոսֆերա 8 Փետրվար, 2024 18:28

Ինչպես արդեն հայտնել ենք՝ ՀՀ վարչապետ Նիկոլ Փաշինյանը Ֆեյսբուքի իր էջում այսօր գրել էր, որ Հայաստանի Հանրապետության թիվ 1 հերոսը աշխատող եւ հարկ վճարող քաղաքացին է:

Գրառման մեկնաբանություններում օգտատերերից մեկը հակադարձել է՝ նշելով․ «Հայաստանի Հանրապետության թիվ 1 հերոսը հայոց բանակի զինվորն է, հարկատուին հերոս անվանելը հերոս արժեքի արժեզրկումն է ...»։

Ի պատասխան սրան՝ Փաշինյանը գրել է․ «Հասկանում եմ ինչ եք ասում եւ Ձեր ասածն ըստ էության տեղավորվում է նախկինում իմ ունեցած ընկալումների շրջանակում: Բայց վարչապետության դառը եւ դաժան վեցամյա փորձը ինձ հանգեցրել է համոզմունքի, որ եթե աշխատող, արդյունք ստեղծող, հարկ վճարող քաղաքացու հարկերով հնարավոր չլինի զինվորին ապահովել անհատական պաշտպանության միջոցներով, ինժեներական ամրաշինություններով, պատշաճ համազգեստով, ծառայողական կեցության նորմալ պայմաններով, ժամանակակից սպառազինությամբ, կապի եւ հետախուզական միջոցներով, տրանսպորտով, սննդով, մարտական հերթապահության պատշաճ պայմաններով, նա չի կարողանա իրականացնել իր հերոսական առաքելությունը: Եւ սա դեռ թվարկում եմ ֆիզիկական ենթակառուցվածքը. բայց սրան պետք է գումարել պրոֆեսիոնալ հրամանատարական կազմը, գաղափարական պատրաստվածությունը, պատշաճ ֆիզիկական պատրաստությունը, կրթության պատշաճ մակարդակը, սկսած նույնիսկ ոչ թե դպրոցից, այլ մանկապարտեզից, իսկ արդեն հետագայում նաեւ զինվորական հմտությունների ապահովման պատշաճ ծրագրային եւ ֆիզիկական ենթակառուցվածքը: Եթե մենք առանց այս ամենն ապահովելու զինվորից ակնկալում ենք հերոսություն, բառիս ձեւակերպելի իմաստով, նրան դատապարտում ենք պարզապես զոհվելու, իրեն հերոս անվանելու մեր պատրաստակամության ավանսով: Նաեւ՝ ինքներս մեզ խաբում ենք: Իսկ վերը թվարկված անհրաժեշտ նախապայմանները հնարավոր է ապահովել միայն խոշոր բյուջետային միջոցներով, սկսած նրանից, որ սպայական եւ զինվորական ծառայությունը սոցիալական երաշխիքների մասով այնքան գրավիչ պետք է լինի, որ դա դառնա պոպուլյար մասնագիտություն: Սպայական կազմին պատշաճ կրթությամբ ապահովելու համար հարկավոր է լրջագույն ծրագրային եւ ֆիզիկական ենթակառուցվածք, իսկ սրա համար հարկավոր են հսկայական բյուջետային միջոցներ: Իսկ այդ միջոցները կարող են ապահովել միայն աշխատող, ավելացված արժեք ստեղծող եւ հարկ վճարող մարդիկ: Ուրիշ տարբերակ չկա, եւ եթե նման մարդկանց հերոս չենք համարում եւ հերոս չհամարենք, հերոս զինվոր կունենանք ավելի շատ զոհվածի կարգավիճակում, ինչը արդեն ունենք, բայց նման բան չենք ուզում ապագայում ունենալ»: