Իրանում գազատարի վրա հզոր պայթյուն է տեղի ունեցել

Իրանի հարավ-արևմուտքում գտնվող Չեհարմեհալ և Բախտիարիա նահանգների Բորուջեն շրջանում փետրվարի 14-ին` ժամը 01:00-ի սահմաններում, հզոր պայթյուն է տեղի ունեցել բարձր ճնշման գազատարի վրա։

Mehr գործակալությունը, վկայակոչելով հրշեջ ծառայություններին, հայտնում է, որ պայթյունը տեղի է ունեցել մայրուղային գազատարի 65-րդ գծի վրա՝ Բորուջեն և Շեհրե Կորդ քաղաքների միջև։

Պայթյունը և դրան հաջորդած հրդեհն այնքան մեծ են եղել, որ դրանք կարելի է տեսնել մինչև 60 կմ հեռավորությունից։

Նախնական տվյալներով՝ զոհեր չկան։

Միջադեպի պատճառները պարզվում են։