«Երուսաղեմում հայերին դուրս մղելու ծրագրավորված քաղաքականություն է վարվում». կրոնագետ

Երեկ՝ դեկտեմբերի 28–ին, Բեթղեհեմ քաղաքում գտնվող Սուրբ Ծննդյան եկեղեցում Ծննդյան տոների կապակցությամբ եկեղեցում իրականացվող մաքրման աշխատանքների ժամանակ հերթական ծեծկռտուքն է տեղի ունեցել հայ և հույն հոգևորականների միջև։

Կողմերին հաջողվել է  բաժանել  ոստիկանության միջամտությամբ:

Հիշեցնենք, որ Հայ առաքելական, Հույն ուղղափառ և  Հռոմի կաթոլիկ եկեղեցիները տնօրինում են Սուրբ Ծննդյան եկեղեցու տարբեր հատվածներ, ինչի պատճառով, հատկապես եկեղեցու մաքրման աշխատանքների ժամանակ, պարբերաբար վեճեր են ծագում եկեղեցիների սպասավորների միջև, որոնք հաճախ վերածվում են ծեծկռտուքի։

Հայկական մամուլը, հիմնականում, արտասահմանյան լրատվական հոսքերին հետևելով, բացասական լույսի ներքո է լուսաբանում այս միջադեպերը՝ ներկայացնելով դրանք իբրև հոգևորականին ոչ վայել պահվածքի դրսևորումներ։

Երեկվա միջադեպի թեմայով ԼՈՒՐԵՐ.com-ը զրուցեց կրոնագետ Դավիթ Միքայելյանի հետ։

«Երուսաղեմում հայերին դուրս մղելու ծրագրավորված քաղաքականություն է վարվում, որովհետև՝ մերոնք էնտեղ տեղացիների համար կարևորագույն տարածքներ ենք զբաղեցնում: Ցավոք, դեպքեր են լինում, երբ հայ հոգևորականների վրա փողոցում քայլելիս նաև թքում են։ Այնպես որ մեզ էստեղ իսկապես «կռվող տղերք» են պետք, որոնք հարձակումների դեպքում կարձագանքեն ըստ արժանվույն։

Այնպես է ստացվում, որ մեր երկիրն իրավական առումով չի կարող միջամտել այդ գործընթացներին, քանի որ կստացվի, որ Հայաստանը միջամտում է մեկ այլ սուվերեն պետության ներքին գործերին, այդ պատճառով աջակցությունը պետք է լինի Հայաստանի հասարակական օղակներով, ինչը և մենք բոլորս պետք է անենք»,– ԼՈՒՐԵՐ.com-ի հետ զրույցում ասաց պարոն Միքայելյանը: