Մակրոնն առաջարկել է ԵՄ-ն, Կովկասը և Արևմտյան Բալկանները միավորել մեկ էներգետիկ ցանցում

Ֆրանսիայի նախագահ Էմանուել Մակրոնը խոսել է Արևմտյան Բալկանների և Կովկասի գործընկերների հետ ԵՄ էլեկտրացանցերը միացնելու անհրաժեշտության մասին, ինչպես նաև առաջարկել է համագործակցություն միջուկային թափոնների ոլորտում։ Այդ մասին նա հայտարարել է՝ ելույթ ունենալով միջուկային էներգետիկայի միջազգային գագաթնաժողովում, որն անցկացվում է Բրյուսելում։

«Մենք պետք է ակտիվորեն աշխատենք միջցանցային կապի ուղղությամբ, որը որոշիչ կլինի վերահսկվող, կայուն և էժան էլեկտրաէներգիայի ապահովման գործում»,- հավելել է Մակրոնը:

Երկրի ղեկավարը մեծ ուշադրություն է դարձրել միջուկային արդյունաբերության զարգացմանը՝ ասելով, որ դա պետք է տեղի ունենա հանածո վառելիքից էներգիայի վերականգնվող աղբյուրներին անցնելուն զուգահեռ։ Մակրոնը նշել է, որ ատոմակայանները կարող են բարելավել երկրների էներգետիկ անվտանգությունը, չնայած Եվրոպայում վեճեր կան միջուկային արդյունաբերության թափոնների կառավարման շուրջ։