Եվրոպան նախապատերազմական դարաշրջան է ապրում. Տուսկ

Լեհաստանի վարչապետ Դոնալդ Տուսկը կարծում է, որ Եվրոպան նախապատերազմական դարաշրջան է ապրում, և դա ամեն օր ավելի ակնհայտ է դառնում։

«Հիմա ամենատագնապալին այն է, որ բառացիորեն ցանկացած սցենար հնարավոր է, մենք նման իրավիճակ չենք ապրել 1945 թվականից ի վեր: Գիտեմ, որ սա ճնշող է հնչում հատկապես երիտասարդ սերնդի մարդկանց համար, բայց մենք պետք է մտովի վարժվենք նոր ժամանակաշրջանին: Մենք ապրում ենք նախապատերազմյան դարաշրջանում, չեմ չափազանցնում, ամեն օր դա ավելի ակնհայտ է դառնում»,- ասել է Տուսկը Pais թերթին տված հարցազրույցում։

Վերջերս Արևմուտքում ավելի ու ավելի են շատանում ՆԱՏՕ-ի և Ռուսաստանի Դաշնության միջև ուղղակի զինված հակամարտության մասին խոսակցությունները։ Կրեմլը նշել է, որ Ռուսաստանի Դաշնությունը վտանգ չի ներկայացնում, չի սպառնում ոչ մեկին, բայց չի անտեսի իր շահերի համար պոտենցիալ վտանգավոր գործողությունները։ Բացի այդ, ըստ ՌԻԱ Նովոստիի, վերջին տարիներին Ռուսաստանի Դաշնությունը նկատել է ՆԱՏՕ-ի աննախադեպ ակտիվություն իր արևմտյան սահմանների մոտ: Դաշինքը ընդլայնում է նախաձեռնությունները և դա անվանում է «ռուսական ագրեսիայի զսպում»։ Մոսկվան բազմիցս մտահոգություն է հայտնել Եվրոպայում դաշնակցային ուժերի կուտակման կապակցությամբ: ՌԴ ԱԳՆ-ն հայտարարել է, որ Ռուսաստանը բաց է մնում ՆԱՏՕ-ի հետ երկխոսության համար, բայց հավասար հիմունքներով, մինչդեռ Արևմուտքը պետք է հրաժարվի մայրցամաքի ռազմականացման կուրսից։