Ֆրանսիայում սինագոգի մոտ պայթյուն է որոտացել. ոստիկան է վիրավորվել

Ֆրանսիայի Լա Գրանդ Մոտե քաղաքում` Բեյթ Յակով սինագոգի դիմաց, այրվել է երկու ավտոմեքենա։ Հրդեհին հաջորդած պայթյունի հետևանքով՝ տուժել է քաղաքային ոստիկանության աշխատակից։ Այս մասին հայտնում է Franeinfo-ն։

Դեպքը Լա Գրանդ Մոտեում տեղի է ունեցել առավոտյան 08:30-ին, երբ անհայտ անձը այրել է երկու ավտոմեքենա, որոնցից մեկում գազի բալոն է եղել։ Պայթյունի պատճառ դարձած հրկիզման արդյունքում՝ տուժել է քաղաքային ոստիկանության աշխատակից։ Հանցագործին որոնելու համար մոբիլիզացվել են ոստիկանական մեծ ուժեր։ Նրան հաջողվել է փախչել դեպքի վայրից։

Հաղորդվել է չորս առանձին հրդեհների մասին։ Դեպքի պահին սինագոգում ոչ ոք չի եղել։ Վիրավոր ոստիկանին ուղարկել են Մոնպելյեի հիվանդանոց, որտեղ նրա վիճակը կայունացել է, և կյանքին վտանգ չի սպառնում։ Լա Գրանդե Մոտեի քաղաքապետ Ստեֆան Ռոսինյոլի խոսքով՝ տեսահսկման տեսախցիկները ֆիքսել են, թե ինչպես է կասկածյալը սինագոգի դիմաց այրում ավտոմեքենաները։