Գերմանիայում դանակով զինված տղամարդը հարձակվել է փառատոնի մասնակիցների վրա, սպանել երեք հոգու

Դանակով զինված տղամարդը հարձակվել է Գերմանիայի Զոլինգեն քաղաքում ընթացող փառատոնի մասնակիցների վրա ու հարվածներ հասցրել։ Ստացած մարմնական վնասվածքներից 3 հոգի մահացել է, 8 հոգի՝ վիրավորվել, նրանցից 5-ի վիճակը բժիշկները ծանր են գնահատում, հայտնում է Associated Press-ը։

Չարագործին դեռ չեն կարողացել ձերբակալել։ Ենթադրվում է, որ նա մենակ է գործել:

Ոստիկանությունը չի հայտնում, թե բացահայտվե՞լ է արդյոք նրա ինքնությունը․ իրավապահները համացանցում հարթակ են բացել, որպեսզի դեպքի ականատեսները այնտեղ ներբեռնեն փառատոնի ժամանակ արված տեսանկարահանումները կամ հաղորդեն ինֆորմացիա, որը կօգնի հետաքննություն իրականացնել։