ՀՀ նախկին նախագահները և Եկեղեցին. MediaHub

MediaHub

Հաշված օրերից՝ սեպտեմբերի 29-ին, հավատավոր ժողովրդի առջև 11 տարվա դադարից հետո իր դռները կբացի Մայր Տաճարը։ Թե՛ Մյուռոնօրհնեքին և թե՛ Մայր Տաճարի վերաօծմանը մասնակցելու հրավեր է ուղարկվել նաև իշխանական վերնախավին։

MediaHub-ի տեղեկություններով՝ հրավեր ուղարկվել է ոչ միայն ներկա, այլ նաև նախկին ղեկավարներին։ Այսպես, թե՛ առաջին, թե՛ երկրորդ և թե՛ երրորդ նախագահները Մայր Տաճարի բացմանը մասնակցելու հրավեր ստացել են: Բայց կմասնակցե՞ն նրանք միջոցառմանը, դեռևս պարզ չէ։

Այսպես, առաջին նախագահ Լևոն Տեր-Պետրոսյանի խոսնակի հետ կապ հաստատվել չստացվեց, ուստի նրա մասնակցության մասին որևէ տեղեկություն ստանալ չհաջողվեց։ Իսկ Ռոբերտ Քոչարյանի և Սերժ Սարգսյանի գրասենյակներից մեզ հետ զրույցում հաստատեցին տեղեկությունը, որ նախագահները հրավեր ստացել են։

Ռոբերտ Քոչարյանի մասնակցության մասին դեռևս հստակ որևէ բան չկա, քանի որ նա երկրում չէ։ 
ՀՀ երկրորդ նախագահի գրասենյակի պատասխանատու Բագրատ Միկոյանն այսօր հրապարակում էր արել՝ նշելով, որ նախագահը երկրում չէ։

Ինչ վերաբերում է երրորդ նախագահ Սերժ Սարգսյանին, ապա նրա գրասենյակից հստակ արձագանքեցին՝ նշելով, որ պատեհ պահին հանրությունը կտեղեկանա՝ նախկին նախագահը մասնակցելո՞ւ է, թե՞ ոչ։

Հիշեցնենք, որ MediaHub-ի տեղեկություններով՝ ներկայիս իշխանական վերնախավը Փաշինյանի գլխավորությամբ մասնակցելու է Մայր Տաճարի վերաբացմանը։

Նարե Գնունի