Տեսչականն ու Հարկադիրը կապարակնքում են «Կեչառիս» հյուրանոցը՝ հանգստացողներին թողնելով դրսում (տեսանյութ)

MediaHub-ը գրում է.

Քաղաքաշինության, տեխնիկական և հրդեհային անվտանգության տեսչական մարմինը այսօր ԴԱՀԿ ծառայության աշխատակիցների հետ մտել է Ծաղկաձորում գործող «Կեչառիս» հյուրանոցային համալիր, որ կապարակնքի հյուրանոցն ու դադարեցնի դրա աշխատանք։

«Կեչառիսը», հիշեցնենք, փոխկապակցված է ԴԱՀԿ ծառայության նախկին ղեկավար Միհրան Պողոսյանի հետ, որը վերջին շրջանում ակտիվացել է քաղաքականապես և Նիկոլ Փաշինյանին իշխանությունից հեռացնելու հայտ է ներկայացրել։ 

MediaHub-ը կապ հաստատեց «Կեչառիսի» տնօրինության հետ, որտեղից մեզ ասացին, որ հյուրանոցը 2005 թվականից գործում է, և Քաղաքաշինության, տեխնիկական և հրդեհային անվտանգության տեսչական մարմինը հիմա որոշում է կայացրել՝ կասեցնելու հյուրանոցի  գործունեությունը՝ պատճառաբանելով, որ հակահրդեհային անվտանգության նորմերը պահպանված չեն (խոսքը վերաբերում է սենյակներում տեղադրված սարքերին)։

«Բայց նշեմ, որ այդ սարքերի նորմատիվը վերաբերում է բացառապես նորակառույց հյուրանոցներին, Երևանում և Հայաստանում ոչ մի հին հյուրանոց էդ սարքերով ապահովված չէ։ Հյուրանոցը բողոքարկել է տեսչական մարմնի որոշումը, ընդ որում՝ դատարանը, առանց տեղյակ պահելու «Կեչառիսին», պատճառաբանելով, թե ինչ-որ տեխնիկական խնդիր է  եղել իրենց համակարգի հետ և ժամանակին չեն կարողացել ծանուցել, և այսօր անսպասելի Հարկադիր կատարման ծառայության աշխատակիցներին ուղարկել է հյուրանոց, որ կապարակնքեն հյուրանոցը։ Ընդ որում, հյուրանոցում հանգստացողներ կան, հիմա պարտադրում են բոլոր հյուրերին դուրս գալ»,- ասացին մեզ «Կեչառիսից»։

ԴԱՀԿ ծառայությունից MediaHub-ին ասացին, որ իրենք ստացել են տեսչական մարմնի ղեկավարի որոշումը՝ համաձայն որի, պետք է ամբողջությամբ դադարեցվի Կոտայքի մարզ, քաղաք Ծաղկաձոր, Օրբելի եղբայրների 20 հասցեում գտնվող օբյեկտի շահագործումը, մինչև հայտնաբերված խախտումների վերացումը։ 

«Երկրորդ կետով՝ ամբողջությամբ դադարեցնել «Կեչառիս հոթել» ՍՊ ընկերության աշխատանքները նշված հասցեում՝ մինչև հայտնաբերված խախտումների վերացումը։ Սույն որոշման ժամկետ սահմանել անհապաղ՝ ելնելով հանրային շահից»,- ասացին մեզ ԴԱՀԿ ծառայությունից։

Թե ինչ է լինելու հյուրերի հարցը, Հարկադիրից ասացին՝ հյուրերին առաջարկվել է տեղափոխվել այլ հյուրանոց, բայց չասացին՝ ում հաշվին, ով պետք է փոխհատուցի հյուրերի կրած վնասն ու անհարմարությունը։ 

Տեսչական մարմնից էլ ասացին, որ տեխնիկական հետազոտություն է իրականացվել «Կեչառիս» հյուրանոցային համալիրում, այնտեղ արձանագրվել է հրդեհային և տեխնիկական անվտանգության նորմատիվ պահանջների խախտումներ, տրվել է ժամանակ դրանք շտկելու համար, ու քանի որ սեղմ ժամկետներում չի ապահովվել այդ շտկելու գործընթացը, և Տեսչական մարմինը որոշում է կայացրել հյուրանոcի գործունեությունն ամբողջությամբ դադարեցնելու վերաբերյալ, իսկ տեսչական մարմնի կայացրած որոշումն արդեն Հարկադիր կատարման ծառայությունը պետք է ապահովի։