ՔԿԾ պետը Սրբազանին ուղարկված օրհնված հացը զանցանք է համարել

Միքայել Սբազանի փաստաբան Արա Զոհրաբյանը հայտարարությամբ է հանդես եկել՝ նշելով, որ հետաքրքիր իրավիճակում է հայտնվել, որը կցանկանա ներկայացնել իրավական և բարոյական կողմերից:

«ԻՐԱՎԱԿԱՆ ԿՈՂՄԸ՝

Հանդիսանում եմ Միքայել արքեպիսկոպոս Աջապահյանի պաշտպանը: Բազմաթիվ անգամ տեսակցել եմ Սրբազանին Երևան-Կենտրոն քրեակատարողական հիմնարկում (ժողովրդական լեզվով ասած՝ ԱԱԾ պադվալում):

Քրեակատարողական հիմնարկի աշխատակիցների հետ, որպես պաշտպան, մեկ խնդիր եմ ունեցել: Նրանք պաշտպանի հետ հանդիպումից հետո առանձին գրաքննության են ենթարկում պաշտպանի կողմից Սրբազանին հանձնվող փաստաթղթերը՝ խախտելով Սահմանադրությամբ և միջազգային պայմանագրերով երաշխավորված անձի պաշտպանության իրավունքները: Սա ոչ միայն Սրբազանի մասով են անում, այլ՝ մնացած բոլոր կալանավորված անձանց: Ինչևէ, այս հարցով բողոք է ներկայացված դատարանին:

Մնացած հարցերով քրեակատարողական հիմնարկի աշխատակիցները շատ հարգալից են: Միքայել Սրբազանն էլ շատ գոհ է վերջիններիս վերաբերմունքից:

2025 թվականի հուլիսի 6-ին՝ կիրակի օրը, ժամը 14:00-ի սահմաններում, տեսակցել եմ Սրբազանին, Սուրբ և Անմահ պատարագին մասնակցելուց հետո: Ինձ մոտ ունեի պատարագի ավարտին մասնակիցներին բաժանվող չորացած լավաշին նմանվող «Մաս», որն անձեռոցիկի մեջ վերցրել էի (պատարագի մասնակիցները Մասը տանում են իրենց ընտանիքի անդամներին և հարազատներին. ստորև կներկայացնեմ, թե ինչ է Մասը):

Երբ Սրբազանին տեսակցում էի, սեղանին դրեցի և հյուրասիրեցի Սրբազանին Մասը, ով շատ մեծ ուրախությամբ և կարոտով վերցրեց և ճաշակեց կեսը:

Այսօր ՀՀ փաստաբանների պալատից ստացել եմ ԱՆ քրեակատարողական ծառայության պետ Ծովինար Թադևոսյանի 14.07.2025թ. գրությունն ուղղված ՀՀ փաստաբանների պալատին, որով վերջինս խնդրել է քննարկման առարկա դարձնել իմ վարքագիծը և փաստաբանների պալատի անդամ փաստաբաններին տալ պարտադիր կատարման ենթակա ցուցում՝ այսուհետ քրեակատարողական հիմնարկներ այցելելիս Ներքին կանոնակարգի պահանջները խստորեն պահպանելու, այդ թվում՝ կալանավորված անձանց կամ դատապարտյալներին տեսակցելիս ընթացակարգի խախտմամբ առարկաներ փոխանցելուց զերծ մնալու վերաբերյալ:

Ծովինար Թադևոսյանն իր գրությամբ ընդունել է, որ ես արգելված առարկա չեմ հանձնել, սակայն գտել է, որ խախտվել է դրա փոխանցման համար Ներքին կանոնակարգով սահմանված ընթացակարգը:

Իրավական մասով 2 խնդիր կա.

1. Արգելված իր չեմ հանձնել Սրբազանին, ինչպես նաև չեմ խախտել ներքին կանոնակարգի ընթացակարգը:

ՀՀ կառավարության 2023 թվականի ապրիլի 13-ի N 543-Ն որոշմամբ հաստատված Ներքին կանոնակարգի 303-րդ կետի համաձայն՝ կալանավորված անձի պաշտպանը, …. ունի խորհրդապահական կարգով ԱՆԱՐԳԵԼ ՏԵՍԱԿՑԵԼՈՒ իրավունք՝ ԱՌԱՆՑ ՏԵՍԱԿՑՈՒԹՅՈՒՆՆԵՐԻ ԹՎԻ և ՏԵՎՈՂՈՒԹՅԱՆ ՍԱՀՄԱՆԱՓԱԿՄԱՆ, անկախ աշխատանքային օրերից կամ ժամերից….:

Պաշտպանը երկարատև հանդիպումների ժամանակ կարող է իր մոտ ունենալ նաև չարգելված առարկաներ, այդ թվում՝ սնունդ, որը կարող է օգտագործել հանդիպումների ժամանակ:

Ներքին կանոնակարգի 163-րդ կետը կարգավորում է երկարատև տեսակցության հետ կապված հարաբերությունները, որը պաշտպանի դեպքում՝ իրավունքի տեսակետից, առնվազն կիրառելի է: Ըստ այդ կանոնի՝ երկարատև տեսակցության եկած անձանց կողմից բերված առարկաները, իրերը և սննդամթերքը, որոնք օգտագործվում են երկարատև տեսակցության ընթացքում և դրա ավարտից հետո կալանավորված անձի կամ դատապարտյալի կողմից չեն տարվում քրեակատարողական հիմնարկի բնակելի գոտի, չեն հաշվվում օրենսդրությամբ սահմանված հանձնուքների կամ ծանրոցների քաշի մեջ։

Այս տեսակետից որևէ օրենքով արգելված չէր ունենալ Մաս և այն հյուրասիրել Սրբազանին: Մասի նկատմամբ նման վերաբերմունքը «Վարչարարության հիմունքների և վարչական վարույթի մասին» օրենքի 5-րդ հոդվածի բնորոշմամբ ձևական պահանջները չարաշահելու արգելքի սկզբունքի խախտում է:

2. Քրեակատարողական ծառայության պետը բացարձակ չի պատկերացնում փաստաբանների պալատի և փաստաբանների փոխհարաբերությունների բնույթը: Փաստաբանությունը գործում է անկախության սկզբունքի հիման վրա: Փաստաբանների պալատի նախագահը չի կարող փաստաբաններին տալ պարտադիր կատարման ենթակա ցուցում:

ԲԱՐՈՅԱԿԱՆ ԿՈՂՄԸ՝

Նախ փորձեմ համառոտ ներկայացնել, թե ինչ է Մասը (եթե հոգևորականներն ավելի մանրամասն պարզաբանումներ կտան, շնորհակալ կլինեմ): Մասը պատրաստվում է նշխարի հետ նույն խմորից: Մասը չի հանդիսանում նշխար (հաղորդություն), նրանում գինին (որպես Քրիստոսի արյուն) խառնված չէ: Մասն, ըստ էության, համարվում է օրհնված հաց: Պատարագի ավարտին, քահանան օրհնում է, մանրացնում է այն, որից հետո բաժանվում է պատարագի մասնակիցներին (բաժանելիս սարկավագն ասում է. «Սա եղիցի քեզ մաս և բաժին Սուրբ Պատարագի»:

Հիմա պատկերացրեք, այս Մասից փոքր կտոր հյուրասիրվել է արքեպիսկոպոսին, և քրեակատարողական ծառայության ղեկավարը այն համարելով «նշխարք» (բացի քահանայից որևէ մարդ իրավունք չունի ձեռքով դիպչել նշխարին) փոխանակ հաշվի առնի, որ կալանավորված անձը արքեպիսկոպոս է և վերջինիս ոչ թե թմրամիջոց են հյուրասիրել, այլ Սուրբ համարվող օրհնված հացի փոքր կտոր, չի զլացել կարգապահական պատասխանատվության հարց է բարձրացրել ու առաջ գնալով ակնկալել է, որ այս մեծ զանցանքը չկրկնելու համար պետք է մյուս փաստաբաններին էլ պարտադիր ցուցում տրվի:

Մեկնաբանությունները թողնում եմ ձեզ:

Ինձ մոտ տպավորություն է, որ հայտարարվել է մրցույթ, թե որ պաշտոնատար անձը կարող է ավելի շատ մերժել սրբությունները»,- նշել է Զոհրաբյանը։