Ավարտվել է 6.279 քրվարույթի նախաքննություն, ստացվել է առերևույթ հանցանքի վերաբերյալ 15.522 հաղորդում

Արթուր Պողոսյանի նախագահությամբ 2025 թվականի օգոստոսի 1-ին ամփոփվել են Երևան քաղաքի քննչական վարչության և ենթակա քննչական ստորաբաժանումների 2025 թվականի առաջին կիսամյակի ընթացքում կատարված աշխատանքները: Այս մասին հայտնում են ՔԿ-ից:

Խորհրդակցությանը մասնակցել են ՀՀ քննչական կոմիտեի նախագահի տեղակալ Վազգեն Ավետիսյանը, Տարածքային քննչական վարչությունների գործունեության վերահսկողության գլխավոր վարչության պետի պաշտոնակատար Վահե Միրզոյանը, Հատուկ հանձնարարություններով գլխավոր վարչության պետ Արման Գալստյանը, Ներքին անվտանգության վարչության պետ Հայկ Երեմյանը, Երևան քաղաքի քննչական վարչության պետ Ռաֆայել Վարդանյանը, Երևան քաղաքի քննչական վարչության պետի տեղակալները և ենթակա քննչական ստորաբաժանումների ղեկավարները:

Հիմնական զեկուցմամբ հանդես է եկել Ռաֆայել Վարդանյանը՝ ներկայացնելով հաշվետու ժամանակահատվածում կատարված աշխատանքների վերաբերյալ վիճակագրական տվյալները:

2025 թվականի առաջին կիսամյակի ընթացքում Երևան քաղաքի քննչական վարչության և ենթակա ստորաբաժանումների կողմից քննվել է 25.290 վարույթ՝ նախորդ տարվա 19.446-ի համեմատ։

Հաշվետու ժամանակահատվածում 1 քննիչի միջին ծանրաբեռնվածությունը կազմել է 121 քրեական վարույթ՝ նախորդ տարվա 88-ի համեմատ:

Ռաֆայել Վարդանյանն անդրադառնալով Երևան քաղաքի քննչական վարչության ստորաբաժանումներում քննված քրեական վարույթների քանակին՝ նշել է, որ վարույթների աճը գերազանցապես պայմանավորված է այն հանգամանքով, որ 2023 թվականից 2024 թվական է փոխանցվել 5.359 քրեական վարույթ, իսկ 2024 թվականից 2025 թվական է փոխանցվել 10.679 քրեական վարույթ: Բացի այդ, 2024 թվականի առաջին կիսամյակում պասիվացված վարույթներից 1.035-ն տեղափոխվել է ընթացիկ քննվող վարույթների շարք, իսկ 2025 թվականի առաջին կիսամյակում՝ 1.766-ը:

Հաշվետու ժամանակահատվածում 2025 թվականի առաջին կիսամյակում ստացվել է առերևույթ հանցանքի վերաբերյալ 15.522 հաղորդում, իսկ 2024 թվականի առաջին կիսամյակում՝ 14.507 հաղորդում, այսինքն՝ 1.015-ով ավելի:

2025 թվականի առաջին կիսամյակում նախաձեռնվել է 11.335 քրեական վարույթ՝ 2024 թվականի 11.664-ի համեմատ, այսինքն՝ 329-ով պակաս:

Հաշվետու ժամանակահատվածում ավելացել է նախաքննությունն ավարտված քրեական վարույթների քանակը: Ավարտվել է 6.279 քրեական վարույթի նախաքննություն՝ 2024 թվականի առաջին կիսամյակի 4.507-ի համեմատ, այսինքն՝ 1.772-ով ավելի:

Ռաֆայել Վարդանյանն իր ելույթում արձանագրել է, որ Երևան քաղաքի քննչական վարչության բոլոր ստորաբաժանումներում ավարտված քրեական վարույթների քանակը դրական տարբերություն ունի նախորդ հաշվետու ժամանակահատվածի համեմատ:

2025 թվականի առաջին կիսամյակում Երևան քաղաքի քննչական վարչության ենթակա բոլոր ստորաբաժանումներում արտադրողականության դրական տարբերություն է արձանագրվել: Նախաքննությունն ավարտված քրեական վարույթներով արտադրողականությունը 9,6-ով կամ 47,1%-ով գերազանցել է նախորդ տարվա հաշվետու ժամանակահատվածի արդյունքներին: Միջինում յուրաքանչյուր քննիչի կողմից նախորդ տարվա 20.4-ի համեմատ այս կիսամյակում ավարտվել է 30 քրեական վարույթ։

Հաշվետու ժամանակահատվածում մեղադրական եզրակացությամբ ավարտված քրեական վարույթների քանակը ևս գերազանցել է 2024 թվականի նույն ժամանակահատվածի արդյունքներին, մասնավորապես՝ 2025 թվականի առաջին կիսամյակում 2.237 քրեական վարույթ՝ 2.316 անձի վերաբերյալ մեղադրական եզրակացությամբ ուղարկվել է դատարան՝ 2024 թվականի առաջին կիսամյակի 1.336 քրեական վարույթի համեմատ:

Այսպիսով՝ 2025 թվականի առաջին կիսամյակում մեղադրական եզրակացությամբ ավարտվել է 901-ով կամ 67,4%-ով ավելի քրեական վարույթի նախաքննություն, քան 2024 թվականի առաջին կիսամյակում:

2025 թվականի առաջին կիսամյակում Երևան քաղաքի քննչական վարչության տարածքային և մասնագիտական ստորաբաժանումներում լուծվել է 14.105 քրեական վարույթի ընթացք՝ 2024 թվականի առաջին կիսամյակի 12.590-ի համեմատ, այսինքն՝ 1.515-ով կամ 12%-ով ավելի:

Քննչական վարչությունում 2025 թվականի առաջին կիսամյակում վերականգնվել է 2 մլրդ 250 մլն 894 հզր ՀՀ դրամ՝ նախորդ տարվա հաշվետու ժամանակահատվածի 604 մլն 507 հզր ՀՀ դրամի համեմատ, այսինքն վերականգնված գումարն աճել է 1 մլրդ 646 մլն 387 հզր ՀՀ դրամով:

Հաշվետու ժամանակահատվածում քննիչների կողմից ներկայացվել Է 10 միջնորդագիր՝ հանցանքի կատարմանը նպաստող հանգամանքները պարզելու և դրանց վերացնելու ուղղությամբ միջոցներ ձեռնարկելու վերաբերյալ:

Խորհրդակցության արդյունքներով Քննչական կոմիտեի նախագահ Արթուր Պողոսյանն արձանագրել է, որ հաշվետու ժամանակահատվածում դատավարական ավարտներով զգալի առաջընթաց է գրանցվել և հույս է հայտնել, որ վարչությունը կշարունակի նույն գործելաոճը:

Քննչական կոմիտեի նախագահը հանձնարարել է ուշադրություն դարձնել տևական ժամանակ քննվող՝ հատկապես կոռուպցիոն բնույթի քրեական վարույթներին, վեր հանել դրանց ձգձգման պատճառները և միջոցներ ձեռնարկել դրանց ընթացքը լուծելու ուղղությամբ:

Արթուր Պողոսյանն անդրադառնալով վարչության կողմից ներկայացված միջնորդագրերին՝ կարևորել է, որ դրանք կրեն շարունակական բնույթ և հանձնարարել է ակտիվացնել տարբեր պետական մարմիններ ուղարկվող միջնորդագրերը՝ հատկապես ընտանեկան բռնության և անչափահասների հետ կապված հանցագործությունների դեպքերի վերաբերյալ քրեական վարույթների նախաքննության ընթացքում:

Խորհրդակցության արդյունքներով Քննչական կմոիտեի նախագահը նշել է, որ Երևանի քաղաքի քննչական վարչության ենթակա ստորաբաժանումներում տեղի կունենան կադրային փոփոխություններ, նշանակումներ կամ փոխատեղումներ, որոնց հիմքում դրվելու են բացառապես ստորաբաժանումների կատարողական արդյունքները: